Aeropuerto di Aruba logra certificacion internacional pa sostenibilidad ambiental

ORANJESTAD - Aruba Airport Authority N.V. (AAA) a anuncia cu Aeropuerto Internacional Reina Beatrix a logra obtene e certificacion Environmental Assessment (IEnvA) di IATA, un reconocimiento internacional importante pa su compromiso cu sostenibilidad y proteccion di medio ambiente.

Pa logra e certificacion prestigioso aki, AAA a pasa mas di dos aña den proceso di capacitacion, evaluacion y verificacion. Durante 2025, aeropuerto a implementa un Environmental Management System (EMS) pa sigui mehora su desempeño ambiental y reduci impacto riba medio ambiente.

Segun Angeline Flemming, Director of Health and Sustainability di AAA, e logro ta resultado di trabou duro di e team di sostenibilidad, hunto cu apoyo di empleadonan, socionan comercial y stakeholders.

Cu e certificacion aki, Aeropuerto di Aruba awo ta forma parti di un grupo selecta di organizacionnan certifica pa IATA y ta busca sigui lidera den responsabilidad ambiental dentro di sector di aviacion.