Analisis: Foto y planta mata no ta gobernacion: politica simbolico sin resultado real

Analisis: Foto y planta mata no ta gobernacion: politica simbolico sin resultado real

Posted on 05/6/2026 11:14 am AST | Updated on 05/6/2026 11:15 am AST

Scirbi pa Tito Laclé

Practicamente diario, nos (media)  ta haya hopi comunicado di e gabinete na mando AVP-FUTURO. Potret aki,potret aya, renobacion aki, plantamento di mata aya, y asina mi por sigui. Y si, hopi di e cosnan ta bon. Aki aya un logro importante, pero mayoria ta keda na un politica simbolico.  Y ora cu gobierno a dicidi di tuma accion  fuerte y duro mes, nan a haci esaki, den un forma cu a ‘backfire’ tambe. Por ta, ta djis un malasuerte e biaha aki? Un bon intencion, mal ehecuta? 

Pa loke ta e cantidad di accion  menciona manera renobacion di bario, cas y plantamento di cantidad di mata, no tin nada malo cu esey manera mi a bisa caba. Y si, riba Noticiacla tambe, bastante ta haya nan espacio, aunke si revisa, esta e contenido di e comunicado ta keda revisa y resumi pa e base di e storia keda, y no wordo politisa den un storia promocional yena cu elogio partidista. 

Pero, e siman aki, esaki a pone mi pensa riba e forma di opera di e gabinete aki. Algo cu gobiernonan semper (AVP sigur) a sa di haci. Y si, tur gobierno ta hacie, pero esaki semper a hacie mas hopi.  Laga mi splica:  E idea cu “trabou den bario + hopi presencia + hopi foto” ta suficiente pa midi desempeño di un gobierno, NO ta sostenibel si bo mira gobernacion como algo serio. Loke mi a caba describi ta  cay den dos concepto conoci: politica simbolico y populismo di gestion.

POLITICA SIMBOLICO

Politica simbolico ta ora gobierno enfoca riba accionnan cu ta visibel y facil di comunica—limpiesa, pintura, plantacion di mata, entrega di cas—pasobra nan ta crea impacto inmediato den percepcion di pueblo. E problema no ta cu e accionnan mes; nan tin balor. Sigur. Pero ora esaki bira e enfoke principal, enbez di parti di un plan mas grandi, e ta bira un sustituto pa politica real.

POPULISMO DI GESTION

Populismo di gestion ta ora liderazgo busca pa mantene popularidad door di mustra actividad constante, pero sin ataca e raiz di e problema. Ta un estilo di goberna unda percepcion ta domina resultado. E slogan implicito ta: “Mira nos haci algo!”, enbez di “Esaki ta e resultado concreto cu bo por midi!”.

KICO ESAKI TA MUSTRA?

Esaki ta mustra falta di profundidad  structural: Problemanan grandi—finansa publico, salud, seguridad, educacion—ta pidi reforma dificil, no djis visibilidad.

ENFOQUE RIBA CORTO PLAZO: Accionnan lihe ta duna beneficio politico inmediato, pero no necesariamente solucion duradero.

USO DI BARIO COMO SCENARIO POLITICO: Presencia den comunidad ta importante, pero si no ta sigui cu politica consistente, e ta bira mas representacion cu solucion.

Pero… e ta malo completamente?

No necesariamente. No. Renobacion di barrio, di cas, limpiesa di barrio y mehoracion di ambiente tin impacto real riba calidad di bida di e ciudadano. Pa hopi ciudadano, esaki ta tangible. E problema ta sinembargo, ora esaki ta wordo presenta como logro principal di gobernacion, en vez di un componente di un  strategia mas amplio.

KICO UN GOBIERNO NA ARUBA MESTER ENFOCA RIBA?

Un isla manera Aruba tin limitacionnan y vulnerabilidadnan unico. Un gobierno serio mester balansa visibilidad cu profundidad:

Finansa publico y debe: Sostenibilidad fiscal, transparensia, y confianza internacional (tema HOFA ta un ehempel).

Economia diversifica: No depende solamente di turismo; crea otro fuente di ingreso.

Seguridad y orden publico: Ley ta existi, pero enforcement consistente ta clave.

Salud y bienestar mental: Problemanan social ta creciendo y pidi inversion serio.

Infrastructura y planificacion: Caminda, awa, energia—no djis mantencion, pero vision di futuro. Crecemento di cantidad di dump ilegal, aumento di air bnb, Bubaliplas, cantidad di permisonan pa mas hotel …

Problemanan structural (manera problema di choler, adicto riba caminda, cacho di caya, falta di vivienda, educacion): Solucion sistematico, no reaccion temporario. 

Y papiando cu varios mandatario e simanan aki, mi por tende cu e problemanan menciona tin nan atencion, pero, y esey ta e pero GRANDI, no tin un solucion concreto ainda, pero, ta trahando ariba dje, etc etc. Mientrastanto ta yena e medionan cu cosnan mas ‘visible’.

Con nos mester yama e estilo aki?

E por wordo defini como: “Gobernacion di percepcion cu accion simbolico”. Of mas directo: “Politica visibel sin profundidad structural suficiente.”

CONCLUCION

Un gobierno no por midi su mes riba cuanto biaha e la drentra un barrio of cuanto foto el a tuma. E pregunta real ta:

¿Problemanan grandi di e pais ta mehora?

Si e respuesta ta no, e ora tur e accionnan visibel ta keda como capa superficial riba un realidad cu no a cambia.

Gobernacion real no ta solamente algo cu bo ta mira, pero cu bo ta sinti den resultado—den bo saco, bo seguridad y bo futuro.

  • Powered by SETAR