Temporalmente pasashi pa Aruba for di Merca ta mas barata cu buelo regional

Temporalmente pasashi pa Aruba for di Merca ta mas barata cu buelo regional

Posted on 05/6/2026 10:03 am AST | Updated on 05/6/2026 10:18 am AST

MIAMI -  Biaha pa Aruba for di ciudadnan grandi den Merca ta bira sorprendentemente barato, te punto cu den algun caso, ta mas economico cu un simple buelo regional entre islanan bisiña den Caribe Hulandes, aunke ta temporal y pa temporada. 

BARATIYO DI AMERICAN AIRLINES 

Segun un oferta reciente di American Airlines, pasaheronan por bula nonstop for di Miami pa Aruba pa apenas $352 dollar roundtrip. E buelo directo entre Miami International Airport y Aeropuerto Reina Beatrix ta dura poco mas cu tres ora, y ta wordo considera uno di e routenan mas consistente entre Florida y Caribe. E oferta ta cubri un weekend largo entre 28 y 31 di mei, un periodo cu Aruba ainda no a drenta den e tempo di vakantie grandi di zomer. Segun e reporte, e temporada aki ta ideal pa bishita Aruba, paso cu isla ta pafor di zona di horcan y tempo ta casi semper igual: solo, biento constante y laman trankil.

OTRO OFERTA DEN PASADO

Pero loke ta realmente hala atencion, ta e comparacion cu prijsnan regional. Anteriormente tabatin un deal cu JetBlue unda un biaha roundtrip entre Aruba y New York a costa apenas entre $258 y $281 dollar. Esaki ta menos cu hopi buelo regional den Caribe Hulandes. Por ehempel, un buelo regular entre Aruba y Bonaire por costa entre $357 te mas di $412 dollar roundtrip, aunke e distancia entre ambos isla ta solamente 187 kilometer y e vuelo ta dura apenas 45 minuut. Si compara cu Aruba-New York, cu tin mas di 3.157 kilometer y casi cinco ora di vuelo, e diferencia ta impresionante.

TEMPORAL

Claro, mester wordo menciona cu e prijsnan barato pa New York tabata special temporal di JetBlue. Otro aeroliñanan manera American Airlines y Delta ta cobra mucho mas halto, cu tarifa cu ta subi pa mas di $500 y $600 dollar roundtrip. Tambe, prijs di pasashi semper ta cambia dependiendo di fecha, demanda y cuanto tempo adelanta un persona haci reserva.

DEBATE RIBA COSTO

Aunke asina, e situacion ta habri debate tocante costo di conectividad regional den Caribe. Pa hopi residente, ta dificil comprende con un buelo relativamente cortico entre Aruba y Bonaire por costa mas cu un vuelo internacional pa ciudadnan grandi manera Miami of New York.

  • Powered by SETAR