• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Corte: E-step por staciona atrobe riba caminda publico temporalmente

ORANJESTAD – Corte diahuebs atardi a dicidi cu e-step por keda riba tereno publico, te ora cu e caso cu e compania(nan) cu ta doño di e stepnan por haya nan dia den corte. Esaki a bin algun ora despues cu autoridad policial y DTP a actua y piki tur e-step y scooter riba caminda publico. Minister encarga cu husticia Arthur Dowers den un reaccion na e portal 24ora.com diahuebs atardi, a mustra su lamento pa e decision di huez, y a sigura cu e lo para duro. Mientrastanto e-stepnan ta bek, pero e interesante ta cu ta permiti pa nan ta staciona riba caminda publico, pero si core cu nan, e persona por haya multa. Otro siman diabierna tin e prome caso den corte. 

REACCION DI GOBIERNO

 Manera indica caba, Gobierno (minister Arthur Dowers:red) a reacciona fuerte riba situacion actual di negoshi y uso di espacio publico, indicando claramente cu no lo acepta ningun intento pa legalisa actividadnan ilegal cu ta crea caos y peliger pa trafico. Segun e declaracion, tin varios grupo cu ya a inicia proceso legal, pero autoridadnan ta consciente di esey y lo enfrenta esaki dentro di marco di ley. “Nos ta un estado di derecho. Tur accion cu nos tuma mester ta basa riba ley, y nos lo usa e medio legal disponibel pa defende interes di pais,” Dowers a declara diahuebs atardi.

BUSCA LEGITIMACION 

Gobierno ta critica argumento di ciertonan cu, segun nan, ta busca legitimacion despues di hopi aña di violacion di regla. Den e contexto ey, a wordo indica cu no por usa pasado di incumplimento como base pa continua violando ley. “No por bisa: pasobra antes tabata pasa, awor mester permiti un tiki mas,” a wordo enfatisa.

DECISION DI JUEZ NO TA DEFINITIVO

Den e asunto, un huez a duna un decision temporal pa trata e caso den corte, pero gobierno ta subraya cu esaki no ta un aprobacion pa legalisa situacionnan ilegal. “Un huez no por legalisa algo ilegal. E decision ta provisional y no lo determina con e situacion lo wordo maneha structuralmente,” Dowers a sigui bisa.

PRECARIO

Tambe a wordo menciona cu hopi di e actividadnan den cuestion no tin permiso (precario) valido. Segun informacion, algun operador a paga pa un periodo, pero despues no a cumpli cu pago pa varios aña, mientras otro nunca a haya autorizacion formal. “Nan no tin derecho riba e terreno y nan a ocupa caminda publico,” Dowers a argumenta.

SEGURIDAD DI TRAFICO COMO PRIORIDAD

Un punto central den e posicion di gobierno ta seguridad. Autoridadnan ta indica cu cierto instalacionnan y actividadnan riba caminda publico por crea situacion peligroso pa trafico, specialmente den area cu tin hopi movemento di turista y transporte.

“Si algo ta crea peliger pa trafico, Polis di Trafico mester interveni y pone orden,” a wordo indica. Tambe a wordo enfatisa cu situacion actual ta wordo considera “inaceptabel” pa comunidad y sector turistico.

CARTA DI ABOGADO Y POSICION FIRME

Dowers a confirma cu abogado di diferente grupo a manda carta solicitando legalisacion di situacion, pero e contesta a keda firme: no lo legalisa ningun actividad cu ta crea desorden of riesgo.

“Si bo permiti un, pronto bo lo tin hopi mas. Esaki lo crea un precedent peligroso,” gobierno ta advirti.

PROCESO LEGAL TA SIGUI

E caso principal lo wordo trata den corte e siman benidero, cu posibilidad di mas proceso despues. Mientras anto, medida temporal, manera multa y control, ta sigui vigente.

Gobierno ta conclui cu lo sigui defende su posicion den corte y cu lo basa tur decision riba ley y interes publico. “Si tin otro caso, nos lo ta presente. Nos lo defende cu claridad cu ley mester prevalece,” a keda declara.