Analisis: Corsou mester disfruta su momento historico: Mundial no ta regalo, ta oportunidad unico

Scirbi pa Tito Laclé

Den ultimo dianan, hopi combersacion ta surgiendo tocante e posibilidadnan di seleccion nacional di futbol di Corsou   pa briya riba escenario mundial. Pero tambe tin hopi comentario cu, francamente, no ta completamente basá riba realidad di futbol internacional. Pa esaki, mi a papia recientemente cu conocido comentarista deportivo Carl Micheal Bikker, cu a splica algun punto interesante, y cu ta alcaso.  

Prome punto segun Bikker, cu mester keda cla ta esaki: Corsou no ta un invitado accidental. E pais a compiti activamente den CONCACAF y a gana su partidonan. Punto. Esey kier men cu su caminda pa un Mundial a pasa pa su rendimiento, no pa simpatia. Of laga mi pone asinaki: Corsou a gana su derecho di ta riba tereno mei mei di tur e grandinan.

CONTEXTO

Pero tin un factor clave cu hopi hende ta ignora, secun e comentarista: Contexto. Den e ultimo ciclo, paisnan manera e seleccion nacional di Merca  , Mexico   y Canada   no a pasa pa eliminatoria tradicional. Esaki ta cambia henter e dinamica den e region. Normalmente, e gigantenan aki ta pone presion fuerte riba paisnan mas chikito manera Aruba, Trinidad y Corsou mes. Y como cu nan no tabatey, e la haci e caminda pa Corsou mas ‘facil’. Y ora cu e ekiponan grandi bolbe despues, e chens pa Corsou e ora ta bira mas chikito. Pues, de echo, esaki por ta un chens unico pa Corsou cu e lo no bolbe mira mas.  Esaki ta haci e logro actual di Corsou mas impresionante, pero tambe mester wordo poni den perspectiva. Euforia ta comprensibel, pero expectativa mester keda realistico. Tin un linea fini entre orguyo y ilusion exagera.

PAIS CHIKITO

Un otro punto importante cu segun e comentarista ta importante: Den futbol moderno, e “pais chikito” casi no ta existi mas. Aña tras aña, equiponan di Africa y otro regionnan ta sorprendiendo mundo caba. E posibilidad cu Corsou por gana un potencia manera Alemania  ta chikito—pero no ta cero. Y ey ta unda futbol bira interesante.

EHECUCION DI PLAN 

Pero pa logra algo asina, mester mas cu entusiasmo. Ta bai depende di preparacion tactico, disciplina, calma riba tereno y un entrenador cu sa exactamente con pa posiciona su ekipo. Futbol no ta gana riba nomber; e ta gana riba ehecucion.

Realidad, sin embargo, ta keda duro: nivel di futbol Europeo y Latinoamericano ta ainda un paso dilanti Caribe. Diferencia den infrastructura, inversion y desaroyo ta evidente. Pesey, Corsou no mester drenta den Mundial cu ilusion cu nan lo domina, pero cu mentalidad pa competi dignamente.

CONCLUSION CLA 

E conclusion ta cla: Corsou mester disfruta cada minuut, cada wega y cada momento di e experiencia di mundial. Pasobra oportunidadnan manera esaki no ta bini tur aña. Cu regreso di e gigantenan den siguiente eliminatoria, e caminda lo bira mucho mas dificil. Mundial pa Corsou no ta solamente competencia—ta un momento historico cu mester wordo aprecia completamente.