Cuerpo policial di Aruba a cuminsa buskeda pa aumenta cantidad di agente policial

Cuerpo policial di Aruba a cuminsa buskeda pa aumenta cantidad di agente policial

Posted on 04/28/2026 2:01 pm AST | Updated on 04/28/2026 2:02 pm AST

SANTA CRUZ — Cuerpo Policial Aruba (KPA) a anuncia cu aplicacion pa aspirant di polis nivel 2 a habri oficialmente. KPA ta invita comunidad pa forma parti di e organisacion policial y contribui na seguridad di pais Aruba.

E oportunidad ta pa posicion di Medewerker Veiligheidszorg nivel 2, unda candidatonan lo haya entrenamiento den leynan, reglanan y proceduranan, y a la vez desaroya personal y profesionalmente den un carera policial.

Desde 28 di april te cu 5 di juni 2026, hoben entre 17 y 34 aña por aplica. Entre e rekisitonan principal ta: tin nacionalidad Hulandes, ta inscribi y biba na Aruba, tin un estatura minimo di 1.60 meter y un diploma MAVO, EPI, EPB Doorstroom of equivalente.

Interesadonan mester yena formulario personalmente na Scol di Polis E.J. Watty Vos na Forthuevelstraat, di dialuna pa diahuebs entre 09:00 y 14:00.

KPA ta enfatisa: “Nos ta buscando abo!” y ta anima tur esnan interesa pa aplica y bira parti di un organizacion dedica na sirbi y proteha comunidad di Aruba.

  • Powered by SETAR