Gobierno ta planta 101 mata pa un futuro mas berde na Henny Eman Boulevard

ORANJESTAD - Gobierno a cuminsa un proyecto di plantacion na Henny Eman Boulevard cu enfoke riba embeyecemento y fortalecemento di biodiversidad. Den e iniciativa, a planta un total di 101 mata nativo, incluyendo diferente especie cu ta contribui na proteccion di suela, mehora calidad di aire y mantene un ecosistema mas balansa.

E proyecto ta forma parti di un programa di reforestacion cu ta busca crea un ambiente mas berde y sostenibel, specialmente den areanan urbano. Organisacionnan como Aruba Conservation Foundation y Aruba Airport Authority N.V. ta hunga un rol importante den e proceso, incluyendo desaroyo di invernadero pa planta vegetacion nativo.

Adicionalmente, e iniciativa ta enfoca riba integra naturalesa den infrastructura urbano, creando “green corridors” pa conecta areanan natural y urbano. E trabounan di plantacion y preparacion di terreno ta wordo coordina pa garantisa sostenibilidad a largo plazo.