Marine Barracks Savaneta ta habri su portanan pa publico dia 1 di mei

Posted on 04/28/2026 9:16 am AST | Updated on 04/28/2026 9:24 am AST

SAVANETA - Marine Barracks Savaneta lo habri su portanan pa publico un biaha mas dia 1 di mei 2026. For di 10:00 AM te 4:00 PM, tur hende ta bon bini pa haya un bista exclusivo paden di Marine Corps.

E Open Dag ta un oportunidad unico pa siña mas tocante Marine Corps y e diferente servicionan di siguridad cu hunto ta percura pa siguridad di Aruba. Guardacosta di Caribe, Cuerpo Policial di Aruba y Brandweer di Aruba tambe lo ta presente pa mustra nan trabou cu demostracionnan impresionante y actividadnan interactivo.

Durante e dia habri, bishitantenan lo por participa activamente den varios actividad emoshonante. Por ehempel, nan por subi riba awa y nabega riba e FRISC, un boto rapido y agil cu ta ofrece un experencia spectacular. Adicionalmente, lo tin oportunidad pa corre riba e Anaconda. Pa esnan cu gusta altura, tin un stashon di rappel unda hende por baha trankil bou di supervision. Tambe tin accion riba tereno: na e stent di paintball, bishitantenan por test nan habilidad di tiramento den un ambiente dificil pero divertido.

Bishitantenan por disfruta di snacknan dushi na e food court y bishita varios stentnan di mercado pa compra cosnan divertido. Un gran atraccion ta e Super Lottery, unda por gana premio nan interesante. Entrada di e karchinan ta bai pa dos institucion caritativo: Fundashon Snoop Doggy y Favi. Tur dos ta traha pa beneficio di comunidad na Aruba. CoolFM y FreshFM lo brinda musica en vivo durante henter dia y tambe lo transmiti bibo for di Marine Barracks.

KEDA INFORMA

Sigui e pagina di Facebook di Open Day na https://www.facebook.com/Opendagmarinierskazerne y download e app “MSK Open Dag” for di App Store (iOS) of Play Store (Android) pa bo no perde ningun noticia.

Pasa, descubri e trabou di Marina Real di Hulanda y su partnernan, y sostene dos iniciativa local na mes momento!

  • Powered by SETAR