Gobierno a lansa corpgov.aw: Gobernacion na Aruba ta bira ley y no solamente palabra

ORANJESTAD  – Minister di Finansa  mr. Geoffrey Wever, a habri e evento pa e lansamento oficial di e website corpgov.aw, marcando un paso importante den e fortalecemento di bon gobernacion na Aruba. E website ta funciona como un plataforma central unda kadernan, splicacionnan y instrumento practico ta bin hunto. Un luga unda directornan y supervisornan por haya direccion, profundisacion y apoyo den nan practica diario.

E proyecto di ley di e Ordenanza Nacional Corporate Governance y e Codigo di Corporate Governance pa Aruba no ta nobo. E politica di participacion gubernamental y e politica di dividendo ta forma e base pa un maneho mas structura y profesional como accionista.  Den pasado e Commission di Corporate Governance a traha riba e documentonan aki. Loke a falta tabata e momento unda contenido, atencion na nivel di gobernacion y implementacion a bin hunto.

Minister di Finansa y su Ministerio di Finansas ta responsabel pa e maneho y coordinacion di participacion gubernamental (deelnemingenbeleid) general di gobierno. E ministernan tin un mandato via minister di Finanzas pa representa Land Aruba como accionista den nos companianan estatal. Den su mes ministerio, un procedimiento transparente a wordo sigui pa e nombramento di un miembro di Raad van Commissarissen di Aruba Agriculture Development Company N.V., unda a publica vacatura abiertamente y a selecciona un candidato basa riba un proceso structura y profesional.

Aruba, como prome pais den e parti Caribense di Reino Hulandes, ta introduci politica cla pa e maneho di participacionnan gubernamental y dividendonan. Cu e entrada na vigor di e legislacion nobo di Corporate Governance, e principionan aki lo bira tambe un obligacion legal, transformando gobernacion di algo simbolico pa algo real y concreto.