Dowers: Tin solucion na caminda pronto pa problema di cacho di caya, cu a bira hopi serio

ORANJESTAD – E problema di cachonan riba caya ta sigui preocupa comunidad y autoridad, mientras gobierno ta trahando riba un serie di medida pa pone mas control riba e situacion. Segun informacion comparti recientemente, e asunto ta wordo trata den diferente comision y reunionnan, cu un enfoque multidisciplinario pa logra solucion sostenibel.

PASO CONCRETO

Un di e pasonan concreto cu ya ta den fase avansa, ta construccion di un clinika veterinario nobo, cu lo yuda pa maneha y tene cachonan den detencion. Paralelamente, gobierno ta desaroyando un maneho cu lo establece con lo trata e cachonan y ken lo ta responsable pa e maneho di esaki.

DESAFIO

Sinembargo, e proceso no ta sin desafio. E minister ta reconoce cu prioridadnan manera seguridad publico y trabou di polis ta carga hopi peso, loke ta haci cu e problema di cachonan no semper por wordo atende cu e rapidez cu comunidad ta spera. Pa esaki, tin plan pa crea un team specialisa cu lo enfoca specificamente riba e tema. Tambe ta trahando riba regulacion nobo, cu segun informacion por wordo anuncia den un futuro cercano, aunque ainda no tin un timeline concreto.

RESPONSABILIDAD DI CIUDADANO 

Dowers a enfatisa cu responsabilidad no ta solamente di autoridadnan. Den hopi caso, ciudadanonan ta cana riba tereno publico como si ta nan mes, sin tuma responsabilidad pa nan animalnan. E mensahe ta cla: no ta acceptabel pa laga cachonan cana liber riba caya sin control. Cu e medida nobo na camino, e pregunta cu ta keda ta con rapido y efectivo gobierno lo logra controla un problema cu ya pa hopi aña ta for di control.