Minister Arthur Dowers awe nochi den Noticiacla LIVE papiando e.o. riba regla nobo di Step

ORANJESTAD – Ministro di Husticia Arthur Dowers lo ta invitado  special awe anochi den programa Noticiacla LIVE, unda e lo enfrenta preguntanan directo di periodista Tito Laclé tocante entre otro e decision abrupto pa prohibi e.o. e-steps y scooters riba camindanan publico per direct. E entrevista lo wordo transmiti pa 8:30pm riba Facebook y YouTube di Noticiacla.

Despues di e anuncio reciente, realidad riba caya ta mustra cu hopi di e vehiculonan aki ainda ta circula. Esaki ta pone pregunta central: ta falta di comunicacion of simplemente falta di enforcement? Den e programa, Dowers lo wordo confronta cu e punto aki tambe.

Tambe lo trata e critica di comerciantenan cu ta bisa cu gobierno a actua di forma abrupto y sin consulta previo. E pregunta cu ta flota den comunidad: tabata esaki un decision necesario pa seguridad, of un paso cu mester tabata maneha cu mas dialogo cu sector privado?

Ademas, lo confronta e mandatario riba consistencia di politica: si awor cu e-stepnan wordo limita pa motibo di seguridad, lo ATV y UTV sigui e mesun caminda? Y con lo maneha caso di turistanan cu ta trece nan propio medio di transporte electrico?

Den un contexto mas amplio, e entrevista lo move tambe pa problema creciente di seguridad di trafico en general. Cu accidentenan subiendo seriamente, lo trata e tema aki tambe cu e mandatario.    

Cu e entrevista aki, Noticiacla LIVE ta pone e tema di seguridad, ley y responsabilidad directamente riba mesa – y duna publico oportunidad pa tende directo for di e ministro. Sintonisa awe 8:30pm riba Facebook y YouTube di Noticiacla.