Aruba ta aposta riba innovacion y creatividad pa un futuro sostenibel

ORANJESTAD – Cu ocasion di Dia Mundial di Creatividad y Innovacion, Aruba ta pone enfasis riba e importancia di innovacion y creatividad como motor pa desaroyo economico y sostenibel. Den un campaña nobo, “Building Up STEAM for Sustainable Development”, organisacion Rainbow Warriors Core Foundation ta promovi uso di ciencia, tecnologia, ingenieria, inteligencia artificial y matematica (STEAM) pa enfrenta e retanan global manera cambio climatico y proteccion di biodiversidad. Asina Rainbow Warriors Core Foundation ta raporta.

E iniciativa, cu a evoluciona for di un campaña anterior enfoca riba urgencia ambiental, awor ta concentra riba innovacion como solucion concreto pa logra e Obhetivonan di Desaroyo Sostenibel (SDGs). Segun e organisacion, creatividad no ta limita na arte so, pero ta cubri tur aspecto di solucion di problema den economia, sociedad y medio ambiente. 

E tema mundial pa 2026, “Step out and Innovate, Harnessing Creativity for Global Progress”, ta invita individuo, estudiante, empresa y gobierno pa tuma accion y crea iniciativa nobo cu por contribui na progreso global. 

Na Aruba, e enfoke aki ta wordo reforza door colaboracion entre diferente fundacion y institucion den marco di Science, Technology and Innovation Platform Aruba (STIP). E plataforma ta busca conecta investigacion, tecnologia y desarrollo economico pa crea un comunidad innovador cu ta contribui tanto local como internacionalmente. 

E campaña tambe ta enfoca riba varios sector clave, incluyendo salud, energia renovabel, economia di conocemento y tecnologia avansa, cu objetivo di fortalece resiliencia economico y crea oportunidad pa empleo y crecimiento sostenibel.

Cu e paso aki, Aruba ta posiciona su mes como un pais cu ta apuesta riba innovacion y creatividad, no solamente pa enfrenta reto actual, pero tambe pa construi un futuro mas sostenibel y competitivo.