AHATA ta pidi investigacion urgente tras acusacion grave contra sector hotelero

ORANJESTAD – Aruba Hotel and Tourism Association (AHATA) diahuebs a pidi oficialmente pa un investigacion profundo, despues cu parlamentario Carlos Bermudez a lansa acusacion serio contra henter sector hotelero, alegando abuso y maltrato di trahadornan sin presenta prueba concreto.

CARTA NA MINISTER

Den un carta manda na Minister di Turismo, Labor y Transporte, Wendrick Cicilia, AHATA a rechasa e acusacionnan y a subraya cu e sector ta comprometi cu empleo responsable y condicionnan digno pa trahadornan.

COOPERACION

Segun e organisacion, sector hotelero – como uno di e motor principal di economia di Aruba – ta dispuesto pa coopera completamente cu cualkier investigacion independiente pa clarifica e situacion. AHATA a pidi pa dentro di 30 dia gobierno presenta un plan concreto di accion y posteriormente e resultado di investigacion.

PREOCUPACION

E posicion firme di AHATA ta refleha e preocupacion den sector turistico riba e impacto di acusacionnan publico sin fundamento, mientras nan ta insisti riba transparencia pa proteha tanto reputacion di industria como bienestar di trahadornan.