Cicilia na Seatrade: Aruba kier mas beneficio di turismo di crucero pa comunidad local

MIAMI - Durante un reunion na Miami cu companianan di crucero, minister encarga cu turismo, Wendrick Cicilia, a papia riba con haci turismo di crucero trece mas beneficio pa economia local. E conversacion a enfoca riba atrae bishitantenan cu ta gasta mas, en vez di simplemente aumenta cantidad di turistanan. Tambe a discuti con negoshinan local por beneficia mas directamente di e sector, y con stimula bishitantenan pa keda mas tempu na isla pa conoce mas di ofertanan local.

Un otro punto importante tabata inclui mas operadornan local den actividadnan di turismo, pa crea mas oportunidad pa mas hende participa den e industria. Tambe a menciona idea di un “Marine Rest Day”, cu ta enfoca riba proteha naturaleza y mantene turismo sostenibel.

En general, e reunion a concentra riba haci turismo di crucero mas util pa comunidad local y mas responsabel pa medio ambiente.