MEP kier proteccion di refineria como patrimonio historico di Aruba

ORANJESTAD – Fraccion di Movimiento Electoral di Pueblo (MEP) a presenta un mocion den Parlamento di Aruba pidiendo pa gobierno tene mas cuenta cu e balor historico y cultural di e refineria, especialmente den caso cu bin desmantelacion.

Durante reunion publico di 16 di april 2026, e tema di futuro di refineria a wordo discuti, y MEP a pone enfasis riba e rol cu e instalacion a hunga den desaroyo di Aruba. Segun e mocion, e refineria a opera pa mas di 60 aña y a contribui significativamente na progreso economico, social y laboral di e isla. Tambe a yuda forma comunidadnan, infrastructura y identidad nacional. MEP ta expresa preocupacion cu gobierno a indica su intencion pa desmantela e refineria sin cu ta cla con e patrimonio historico lo wordo proteha. Segun e partido, e facilidadnan tin un balor importante cu mester wordo conserva pa generacionnan futuro.

Den e mocion, MEP ta urgi gobierno pa garantisa cu parti significativo di e refineria lo keda conserva como patrimonio. Ademas, e partido ta propone pa investiga creacion di un museo, monumento of otro tipo di espacio permanente pa mantene historia di e refineria bibo.  Tambe ta pidi pa presenta un plan concreto na Parlamento, unda preservacion historico-cultural ta integra den cualkier proceso di desmantelacion.

E iniciativa aki pone enfoke riba un debate mas amplio: con Aruba lo maneha su pasado industrial mientras cu ta mira pa futuro economico.