Minister Wyatt-Ras di Salud y Asuntonan Social ta den Noticiacla LIVE awe

ORANJESTAD – Diahuebs anochi, Noticiacla LIVE lo tin como invitado Minister di Salud y Asuntonan Social, Mervin Wyatt-Ras. E programa, modera pa Tito Laclé, lo cuminsa 8’or y mei y lo wordo transmiti biba riba Facebook page y YouTube channel di Noticiacla.

Den e entrevista, publico por spera un conversacion directo y critico riba e estado actual di sistema di salud y sector social na Aruba. Entre e temanan central ta e resultado concreto despues di un aña den poder, y tambe unda minister mes ta reconoci cu tin falta of retraso.

Un otro punto clave lo ta e presion cu sistema di salud ta enfrenta, incluyendo lista di espera, falta di specialistanan y carga financiero riba AZV. Pregunta lo surge si realmente tin cambio visible pa ciudadano, of si e alivio ainda no ta sinti den practica.

Costonan creciente di salud tambe lo wordo pone riba mesa: tin un plan real pa mantene sistema sostenibel, of ciudadano lo mester prepara pa mas gasto? Na mes momento, atencion lo bai riba problema social creciente, manera adiccion, depresion y violencia domestico, y kiko accion concreto a wordo tuma pa combati esaki.

E cuido di adulto mayor y apoyo pa grupunan vulnerable, manera famianan den pobreza, lo forma parti di e discusion, cu enfoke riba resultado medibel y no solamente promesanan.

Tambe lo tin espacio pa reflexion personal, unda Wyatt-Ras lo enfrenta preguntanan riba su estilo di liderazgo, diferencia entre su rol como parlamentario y minister,  

E edicion aki di Noticiacla LIVE ta priminti   pa bira interesante, cu temanan cu ta toca directamente cu bida di cada ciudadano na Aruba.