Vd Burg: Geschillenregeling lo evita cu HOFA ta keda un ley eterno

Vd Burg: Geschillenregeling lo evita cu HOFA ta keda un ley eterno

Posted on 04/16/2026 10:27 am AST | Updated on 04/16/2026 10:29 am AST

ORANJESTAD – Preocupacion riba e futuro di e ley HOFA ta sigui crece na Aruba, unda hopi ta teme cu e ley di reino, aunke tin un duracion defini, den practica lo no termina nunca. Durante programa Noticiacla LIVE e siman aki, periodista di Noticiacla, Tito Laclé, a pone e cuestion directamente na secretario di estado hulandes Eric van der Burg.

INTERPRETACION DI HULANDA VS ARUBA

E inquietud principal ta cu diferencia di interpretacion entre Hulanda y Aruba riba e logro financiero, por haci cu e fin di e ley nunca lo yega. Mientras Hulanda por considera cu situacion financiero ainda no ta suficiente bon na final di cuenta, Aruba por tin un opinion diferente. Esaki ta alimenta e miedo cu Hulanda lo tin e ultimo palabra pa determina si Aruba ta cla, manteniendo HOFA activo sin un fin determina.

VAN DER BURG TA RECONOCE PREOCUPACION

Van der Burg a reconoce e preocupacion y a indica cu e solucion ta den creacion di un sistema formal pa resolve conflicto. “Pa evita e tipo di situacion aki, ta importante cu tin un geschillenregeling,” e la declara. Segun e mandatario, e mecanismo aki ya ta contempla den e statuto, y actualmente tin un propuesta presenta door gobierno di Aruba na Raad van State.

“E tipo di regla aki lo aplica pa tur cuater pais den Reino y lo duna un mecanismo independiente pa trata (cualkier) diferencia di opinion. Esaki ta crea un garantia cu (un) conflicto manera esaki no ta surgi,” Van der Burg a sigui splica.

KEN TIN ULTIMO PALABRA: HULANDA OF ARUBA

Sinembargo, ora a puntra van der Burg, ken lo tin e ultimo palabra den caso di un desacuerdo, e la admite cu esaki ainda no ta claramente defini. “E sistema ainda no ta na vigor. Nos ta trahando riba dje hopi aña caba, desde 10-10-10,” e la bisa, reconociendo cu e proceso a tuma demasiado tempo. Segun Van der Burg, e establecimiento di un sistema di resolucion di conflicto ta un paso clave pa futuro. “Esaki ta algo cu lo tin mi atencion den añanan benidero,” e la conclui, enfatizando e necesidad pa mas claridad y balansa den relacion entre paisnan den Reino Hulandes.

E declaracion aki no ta elimina tur duda, pero si ta confirma cu sin un mecanismo independiente, e discusion riba HOFA y su fin lo sigui genera incertidumbre na Aruba.

  • Powered by SETAR