MEP: Departamento nobo di gobierno ta lanta pregunta serio riba transparencia y legalidad

ORANJESTAD – Creacion reciente di e Direccion di Relacionnan di Reino y Union Europeo a pone gobierno bou di presion, despues cu e decision a wordo tuma sin informa Parlamento, sin conseho previo y sin menciona den presupuesto 2026. E manera cu esaki a sosode ta lanta duda riba respeto pa procedimentonan y rol di control di Parlamento. Asina e partido opositorio MEP ta raporta. 

E preocupacion ta crece paso e departamento nobo ta asumi tareanan cu ya tabata den man di otro instancianan publico, poniendo en cuestion su necesidad real y e gasto adicional cu esaki ta implica, manera personal, organisacion y huur di un edificio nobo na Playa. Esaki ta pasa mientras gobierno mes a anuncia medida pa corta gasto.

Situacion ta bira mas delicado ora cu tin otro departamentonan gubernamental cu ta traha bou di condicionnan precario, manera e seccion di rijbewijs di Cuerpo Policial di Aruba, unda circunstancianan no ta na nivel digno.

A base di esaki, fraccion di MEP a pidi aclaracion formal riba e base legal, e costo total y e proceso di seleccion di e edificio huur, incluyendo si a cumpli cu e requisito di multiple oferta. Tambe a cuestiona pakico no a duna prioridad na servicionan cu realmente tin necesidad urgente di mihor facilidatnan.

E caso aki ta subraya importancia di transparencia, bon gobernacion y uso responsabel di placa publico, recordando cu Parlamento tin deber di controla y gobierno obligacion di rindi cuenta dentro di e periodo estableci.