S&P a subi rating di Aruba pa A-, pero riesgo ta keda

S&P a subi rating di Aruba pa A-, pero riesgo ta keda

Posted on 04/8/2026 3:28 pm AST | Updated on 04/8/2026 3:38 pm AST

ORANJESTAD – Agencia internacional S&P Global Ratings diaranson a subi e evaluacion financiero di Aruba di ‘BBB+’ pa ‘A-’, indicando cu posicion economico y financiero di pais a fortalece. Segun e informe, economia cu ta crece y hecho cu gobierno ta gasta cu disciplina—tin mas entrada cu gasto—ta permiti Aruba paga su debe poco poco y mehora su situacion general.

MENOS INTERES

Un factor importante ta cu gobierno awor ta paga menos interes riba su debe, y ta spera cu e gasto aki lo sigui baha. Esaki ta posibel pasobra entrada di gobierno ta mantene fuerte, principalmente danki na turismo, mientras e debe total ta sigui reduci. Tambe, Aruba tin mas activo, manera fondo di pensioen y inversionnan, cu ta yuda compensa e carga di debe.

KICO E EVALUACION NOBO KIER MEN

E evaluacion nobo di ‘A-’ ta nifica cu Aruba awor ta wordo considera mas confiabel financieramente. E perspectiva ta keda “stabiel”, loke ta indica cu S&P ta spera cu economia lo sigui crece, aunke mas lento, y cu gobierno lo continua maneha su finansas cu cuido, manteniendo un bon relacion cu Hulanda.

NO TUR COS TA POSITIVO

Sinembargo, e informe ta pone claro cu no tur cos ta positivo. Economia di Aruba ta depende fuertemente riba turismo, loke ta haci pais vulnerabel pa crisis externo, manera a wordo mira durante pandemia. Den e periodo ey, entrada di gobierno a baha drasticamente y debe a subi, pero apoyo financiero di Hulanda a yuda stabilisa situacion.

SURPLUS

Desde 2022, gobierno a logra paga aproximadamente 600 miyon florin di debe, y na 2025 tabata tin un sobra di placa den su budget. E tendencia aki ta indica cu Aruba ta bai den direccion correcto, cu debe cu lo sigui baha den e añanan binidero. Tambe, un fondo di pensioen fuerte cu tin hopi reserva ta contribui pa fortalece e posicion financiero di pais.

Den sector financiero, e sistema bancario ta mantene stabiel, cu banconan cu tin suficiente reserva y capital. Banco Central ta sigui mantene e florin pega na dollar Mericano, loke ta limita algun flexibilidad, pero ta duna stabilidad.

Inflacion tambe a baha, yegando na 0.4% na 2025, despues di un periodo di prijs halto. Sinembargo, crecemiento economico lo keda modera, cu un estimacion di 1.9% pa 2026, mientras turismo ta sigui domina economia, cu gran parti di bishitantenan biniendo for di Merca.

Relacion cu Hulanda ta keda un pilar importante den e stabilidad di Aruba. Durante pandemia, Hulanda a brinda mas cu 900 miyon florin den apoyo financiero, y te awe e relacion aki ta contribui na confianza internacional y acceso na financiamiento.

En corto: Aruba ta den un posicion financiero mas fuerte y ta gana mas confianza internacional, pero dependencia riba turismo y necesidad pa disciplina fiscal ta keda un factor decisivo pa su futuro.

  • Powered by SETAR