CBA: Aruba mas popular cu nunca, pero menos cerca di turista Mericano

CBA: Aruba mas popular cu nunca, pero menos cerca di turista Mericano

Posted on 04/7/2026 8:56 am AST | Updated on 04/7/2026 9:06 am AST

ORANJESTAD – Sector turistico riba Aruba ta sigui crece, pero e fuente di e crecimiento ta cambia visiblemente. Esaki ta sali na cla for di cifra nobo di Centrale Bank van Aruba, cu ta mustra cu cantidad di bishitante den januari a subi cu 9,4 porciento, mientras cu cantidad di pernoctacion a aumenta cu 9,7 porciento. Loke ta llama atencion ta cu e crecimiento cada biaha ta wordo menos depende di mercado Mericano.

Merca ta sigui e mercado mas grandi, pero cu un crecimiento di 3,1 porciento e aumento ta relativamente limita. Di otro banda, tin un subida fuerte for di Latino America, unda cantidad di bishitante a crece cu mas cu 33 porciento. Europa tambe ta mustra recuperacion cu un crecimiento di mas cu 15 porciento. Mesun tempo, entrada for di Venezuela a baha fuertemente cu casi 25 porciento.

E cifranan ta indica un cambio claro den composicion di turismo. Aruba ta bira menos dependiente di un solo mercado dominante y ta atrae bishitante for di un mezcla mas amplio di regionnan. Esaki tambe ta visibel den e indice di diversificacion, cu ta sigui baha. Un score mas abou kier bisa cu turismo ta miho distribui entre diferente paisnan.

TENDENCIANAN ECONOMICO

E desarroyo aki ta cuadra cu tendencianan economico mas amplio riba isla. Anteriormente ya a sali na cla cu cantidad di placa den circulacion y credito riba Aruba ta aumenta, y reserva internacional ta crece te casi cuatro biyon florin.

Entrada continuo di turista ta hunga un rol importante den esaki, pasobra nan ta trece divisa stranhero den pais. Banconan despues ta convierti un parti di esaki den prestamonan, cu ta stimula economia interno.

Pero, mesun tempo, ta surgi un tension nobo. E diversificacion di turista ta haci sector menos vulnerabel pa fluctuacion den un solo mercado, pero tambe ta crea mas dependencia di regionnan cu por ta menos estable economicamente of politicamente. Por ehempel, crecemiento fuerte for di Latinoamerica ta bin cu mas riesgo, mientras cu mercado Mericano ta ofrece mas estabilidad pero ta crece menos rapido.

Cu esey, no solamente tamaño di turismo ta cambia, sino tambe su caracter. Sector ta sigui crece, pero ta bira mas complejo y menos predecibel. Hunto cu aumento di masa monetario y crecimiento di credito, esaki kier bisa cu economia ta wordo impulsa, pero tambe ta bira mas sensibel pa shock externo y presion di prijs den pais.

  • Powered by SETAR