Dos minister di Aruba lo compaña Rey Willem-Alexander den su bishita na Merca

AMSTERDAM - Rey Willem-Alexander y Reina Máxima lo haci un bishita di trabou na Merca entre 13 y 15 di april 2026, cu parada na Filadelfia, Washington DC y Miami. Meta principal di e bishita ta fortalece relacion economico, cultural y politico entre Merca y Reino Hulandes, cu enfoke riba comercio, innovacion, salubridad y tecnologia.

Un punto importante di e bishita ta Florida, unda tambe lo pone enfasis riba e relacion cu Caribe dentro di Reino. Merca ta e socio comercial mas importante pa Aruba, y Miami ta funciona como hub principal pa comercio y transporte entre Merca y Latinoamerica.

Aruba ta representa activamente durante e bishita na Miami. Minister di Relacionnan den Reino, Educacion, Hubentud, Innovacion y Deporte, Gerlien Croes, huntu cu Minister di Turismo, Transporte y Labor, Wendrick Cicilia, lo participa den e programa oficial. Nan lo forma parti di encuentro cu lidernan economico, inversornan y otro actornan importante.

Durante e programa na Miami, lo tin reunion cu sector empresarial riba oportunidadnan di comercio y inversion, incluyendo tema manera logistica, empleo y desarrollo di talento. Tambe lo tin encuentro cu studiante caribeño y discusion riba cooperacion entre Florida y Caribe.

Ademas, e agenda ta inclui tema relevante pa Aruba manera resiliencia contra inundacion, desaroyo maritimo y turismo. E bishita ta confirma e importancia di e relacion entre Aruba y Merca, especialmente via Florida como puerta strategico pa comercio y colaboracion regional.