NASA ta prepara pa prome mision tripula pa bolbe na luna despues di mas cu medio siglo

CAPE CANAVERAL – NASA ta preparando pa lansa e prome tripulacion di astronautanan rumbo pa luna despues di mas di 53 aña, cu su di dos mision Artemis. E buelo aki ta un prueba critico den e meta mas grandi di humanidad pa explora luna, mientras cu Merca ta core pa reafirma su liderato den espacio, enfrentando competencia creciente di China.

Tres astronauta di Merca y un di Canada ta programa pa lansa riba capsula Orion di NASA y cohete Space Launch System dia diaranson, pa un mision di prueba di 10 dia cu lo bai rond di luna y bolbe bek. E biajhe ta sigui un ruta largo cu lo hiba nan mas leu den espacio cu nunca antes humanidad a yega.

E mision aki ta e prome vuelo di prueba tripula den e programa Artemis di NASA, e esfuerzo principal di Merca pa cuminza cu vuelo regular na luna. Desde 2012, e programa a costa por lo menos 93 biyon dolar. No tabatin ningun ser humano cu a pisa riba superficie di luna desde Apollo 17 na 1972, un logro dificil cu NASA kier ripiti na 2028 na e polo sur di luna.

Merca ta e unico pais cu a logra manda humano na otro cuerpo celestial, cu seis aterisahe lunar den e programa Apollo, impulsiona door competencia cu e anterior Union Sovietico.

Mas recientemente, oficialnan di Merca a pone mas enfoke riba China, un rival tecnologico fuerte cu a haci progreso constante den su propio programa lunar den ultimo añanan, incluyendo varios aterisahe robotico na luna y un meta pa pone su propio tripulacion riba superficie pa 2030.