FIA ta ahusta regla di Formula 1 na Japon, Verstappen ta confronta periodista

SUZUKA – FIA, e autoridad maximo di careda di Formula 1, a dicide pa flexibilisa un regla tecnico durante clasificacion di Gran Premio di Japon, pa duna pilotonan di Formula 1 mas libertad riba pista. E cambio ta reduci e carga maximo di bateria, loke ta haci e auto nan un tiki mas lento, pero ta permiti piloto nan bay mas full sin mester preocupa tanto pa uso di energia. E medida ta valido solamente pa clasificacion; durante carrera, e regla nan ta keda igual. Segun Max Verstappen, e cambio ta yuda “un tiki”, pero piloto nan ainda mester maneha energia cu cuido. E decision ta bin despues di critica fuerte durante e prome dos fin di siman di carrera, unda piloto nan tabata obliga pa controla nan bateria constantemente, afectando nan performance y experiencia riba pista.

Ademas di esaki, Verstappen a crea un momento notable durante un sesion cu prensa, ora e la pidi un periodista di The Guardian pa bandona e sala prome cu e cuminsa papia. E reaccion tabata relaciona cu un pregunta critico cu e periodista a haci despues di un carrera anterior, algo cu Verstappen claramente no a lubida.

 FIA a indica cu e ahuste ta basa riba feedback di piloto y teamnan, cu kier mantene clasificacion como un verdadero reto di rendimiento.