OM ta pidi 2,5 aña di prizon pa Ali B den apelacion di caso di abuso sexual

DEN HAAG – Ministerio Publico (OM) na Hulanda a exigi un condena di 30 luna di prizon (2,5 aña) contra rapper Ali B den su apelacion pa un caso di abuso sexual. E pena pidi ta mas halto cu e sentencia anterior di 2 aña di prizon cu corte a impone na 2024, unda e la wordo declara culpabel di violacion y un intento di violacion.

Segun OM, e delitonan sexual ta tin un impacto profundo riba victimanan, cu ta lucha cu confianza y seguridad personal despues di e incidente. E fiscal a indica cu Ali B a cambia  bida di e muhernan involucre completamente.

E caso ta trata di varios acusacion cu ta data di 2014 y 2018 y cu ta involucra tres muher. Den apelacion, OM ta busca mas condena riba algun punto, incluyendo un caso di agresion sexual, aunke pa otro acusacion no tin suficiente prueba adicional.

Pa e caso di violacion cu involucra cantante Ellen ten Damme, OM ta considera cu tin suficiente prueba pa confirma cu e acto a tuma lugar completamente, no solamente como intento. Esaki ta diferente di e conclusion di corte anteriormente.

Durante e proceso, a sali na cla cu algun di e muhernan a wordo intimida y amenaza, tanto online como na nan cas. Tambe a bin informacion nobo di testigonan, cu ta agrega mas detaye na e caso.

E proceso di apelacion lo continua cu un ultimo audiencia, despues di cual corte lo tuma decision riba 7 di mei. Ali B ta nenga tur acusacion y ta pidi absolucion completo.