Avion a dal den un truck di bombero na New York, y mata e pilotonan

NEW YORK - Un avion di Air Canada Express a dal cu un vehiculo di bombero durante su aterisahe riba aeropuerto LaGuardia na New York. E  capitan y copiloto a perde nan bida den e incidente. E personanan den e auto di brandweer a keda herida. Pa motibo di e accidente, e aeropuerto a wordo cera.

Segun medio mericano, e vehiculo di bombero tabata tripula pa polisnan. Dos polis a sufri heridanan grave, incluyendo hueso kibra.

Den e avion tabatin 72 pasahero y cuatro miembro di tripulacion. Total di 41 pasahero y tripulante a wordo hiba hospital den cercania, algun cu heridanan serio. Mayoria ya a laga hospital, segun autoridadnan. Nueve persona ainda ta hospitalisa.

OTRO INCIDENTE

E avion tabata un modelo Bombardier CRJ-900 cu a yega for di Montreal. E choque a tuma luga cu un velocidad di mas o menos 39 kilometro pa ora.

E vehiculo di brandweer tabata riba pista pa atende un otro incidente. Un avion di United Airlines a cancela su take-off despues cu un luz di advertencia a sende den cockpit y pasaheronan a reporta un holo straño. Miembronan di tripulacion a sinti nan mes malo debi na e holo, y pa esey a pidi asistencia.

Segun CBS News, grabacionnan di comunicacion ta mustra cu control di trafico aereo a purba adverti of stop e vehiculo di bombero. Aun asina, e vehiculo tabata riba pista na momento cu e avion tabata aterisa. No ta cla unda e error den comunicacion a tuma luga.

CONDICION DI TEMPO

Aeropuerto LaGuardia a wordo sera pa investigacion. Autoridad di aviacion FAA a indica cu e aeropuerto lo keda sera te mitar di atardi. Buelonan cu tabata pa yega a wordo redirigi of a bolbe na nan punto di salida.

Aeropuerto a bisa diasabra anochi cu tempo lluvioso y nubla por afecta e operacion di buelonan. No ta cla si e condicion di tempo tabatin algo di haber cu e accidente.