Noticiacla ta forma parti di buki conmemorativo cu Rey Willem-Alexander a ricibi

ORANJESTAD – Rey Willem-Alexander a ricibi e buki conmemorativo ‘Pueblo di resistencia/40 aña Pais Aruba’ diaranson na Aruba durante su bishita cortico. Den e buki, 35 stakeholder di sociedad arubiano y cientificonan ta describi kiko 40 aña di Status Aparte a trece pa e isla, kiko a bay bon y kiko (ainda) por mehora. Den esaki tambe, Noticiacla su editor Tito Laclé ta figura. Mientrastanto, den e buki di 208 pagina, 15 autor invitado tambe ta comparti nan recordacionnan personal di nan colaboracion cu prome minister-presidente di Aruba, Henny Eman, kende a fayese aña pasa. E prologo a wordo scirbi pa e presidente di gobierno di Reino, prome minister Rob Jetten.

Rey Willem-Alexander a participa den e  conmemoracion y celebracion di 40 aña di Status Aparte. Prome minister actual Mike Eman a entrega e hefe di estado e prome copia di ‘Pueblo di resistencia’, cu ta tambe e unico copia di henter e edicion cu a wordo equipa specialmente cu un cinta di lesa color oraño pa e ocasion. E buki a wordo compila pa René Zwart (fundador di Antilliaans Dagblad y creador di website DossierKoninkrijksrelaties.nl) y Luc Alofs (antropologo cultural y historiador na Universidad di Aruba).

E variedad di area di trabou di e autor invitado nan, nan diferente perspectiva y e gran diversidad di conclusionnan y recomendacionnan ta haci e contenido varia y hopi biaha sorprendente; mescos cu Aruba y su pueblo. E compiladornan a scoge conscientemente pa – fuera di e prologo y un articulo introductorio – no laga politico activo papia den e buki.

E buki ta destina pa personanan cu ta contribui significativamente na sociedad arubiano y p’esey lo no wordo bende.