Rotterdam ta declara guerra contra zonido: camara nobo pa para asocialnan di trafico

ROTTERDAM – Ciudad di Rotterdam a cuminsa un lucha directo contra zonido di trafico cu ta crea molester den comunidad. Cu introduccion di camara di zonido, autoridadnan kier pone un stop na auto y motor cu ta haci demasiado zonido riba caya. Den poco tempo lo cuminsa un prueba cu camara instala na cuatro lugar strategico den ciudad. E sistema por midi nivel di zonido di vehiculonan den decibel y automaticamente saca imagen ora e limite   wordo pasa. E tecnologia ta completamente nobo, y pa esei municipio ta colabora estrechamente cu Ministerio Publico (OM) pa determina si e sistema ta fiable y legalmente util. Segun autoridadnan, zonido di trafico ta un di e motibonan principal di molester entre habitantenan di Rotterdam, specialmente riba dianan solo y ora cu ta mas movimiento riba caya. Un concehal di movilidad a expresa claramente: “Nos kier haci algo real contra e asocialnan di trafico cu ta pone ciudad inseguro y ta causa molester constante.”

CAMARANAN TA BIN PRONTO – PERO E RETO LEGAL TA GRANDI

Promer cu vacacion di verano, e prome camaranan lo wordo instala na Haagseveer (centro) y Strevelsweg (Rotterdam-Zuid). Despues nan lo wordo move pa Maasboulevard y Laan op Zuid. Cada lugar lo wordo monitorea pa cuatro siman. Durante e periodo aki, ta evalua si e camaranan por identifica exacto cual vehiculo ta causa e zonido. Esaki ta crucial, pasobra e reto legal mas grandi ta determina claramente diferensia entre zonido di fondo y un vehiculo cu realmente ta causa desordo. E resultado di e prueba lo wordo presenta na Ministerio Publico, cu lo decide si e sistema por wordo usa oficialmente.

AUN NO TIN MULTA – PERO CAMBIO GRANDI POR BIN

Actualmente, causa zonido no ta considera un infraccion directo den ley di trafico. Solamente “zonido innecesario” ta prohibi, y esaki ainda mester wordo constata na momento mes pa un inspector. Pero si e prueba ta un exito, esaki por cambia drasticamente. E zonido midi por wordo conecta directamente na placa di vehiculo, permitiendo autoridadnan evalua infraccion despues, sin mester cacha hende riba momento mes. Esaki lo aumenta significativamente e probabilidad pa haya infractornan y por marca un paso grandi den combate contra desordo riba caya.