Pelicula cortico y cancion ‘Mi Rason’ ta celebra identidad y orguyo cultural di Aruba

ORANJESTAD – Aruba Tourism Authority (A.T.A.) a estrena e pelicula cortico y soundtrack “Mi Rason” oficialmente riba diaranson 11 di maart, un proyecto cultural cu ta resalta identidad, historia y orguyo di Aruba. E evento a tuma luga na Gasparito Aruban Estate den presencia di Minister di Turismo Wendrick Cicilia, CEO di A.T.A. Ronella Croes, actornan y artistanan local.

Durante e estreno, cantantenan Rodrick “Rocco” Franken y Freddy Rasta a presenta e cancion “Mi Rason” en bibo, loke a duna e anochi un atmosfera emocional cu a conecta invitadonan cu e mensahe di e produccion.

E pelicula ta conta e historia di un mucha homber Arubiano cu ta sigui su soñonan riba isla, tocando temanan manera educacion, cultura, balornan y turismo. Actor principal ta Rocco Franken, hunto cu su yiu Zevi Franken, cu participacion di diferente talento local.

Segun A.T.A., e proyecto tin como meta fortalece orguyo nacional y invita comunidad pa reflexiona riba kico ta nan propio rason pa stima y cuida Aruba. E estreno ta cai dentro di e celebracion di 40 aña di Status Aparte y 50 aña di Himno y Bandera.

E pelicula Mi Rason lo wordo transmiti riba TeleAruba tur diaranson y diabierna durante luna di maart, y tambe ta disponibel riba YouTube di Aruba Tourism Authority.