BCA: Consumo y turismo ta fuente principal di entrada pa gobierno di Aruba

ORANJESTAD – Gobierno di Aruba ta ricibi e mayoria di su entrada for di impuestonan riba consumo y turismo. Esaki ta sali cla for di e cifranan mensual mas reciente di Centrale Bank van Aruba tocante luna di januari 2026.

Den januari, gobierno a ricibi casi 167 miyon florin na entrada, di cual casi 164 miyon florin a bin for di impuestonan. Otro entrada, manera dividendo of otro tipo di entrada adicional, a representa solamente un parti chikito di tres miyon florin.

IMPUESTO RIBA VENTA

E contribucion mas grandi ta bin for di impuesto riba benta (BBO/BAVP), cu den januari a genera mas di 42 miyon florin. E impuesto aki ta wordo cobra riba benta di producto y servicio, y ta mustra nivel di consumo den economia. Ademas di esey, impuestonan riba entrada y ganashi tambe ta keda un fuente importante di entrada pa gobierno. Hunto, nan a genera casi 42 miyon florin den januari. Di e suma ey, e parti mas grandi ta bin for di impuesto riba salario, cu a aporta 27 miyon florin.

IMPUESTO RIBA PRODUCTO

Impuestonan riba producto, manera accijns y derecho di importacion, a genera casi 35 miyon florin. Den e categoria aki ta cay, por ehempel, accijns riba benzina, alcohol y tabaco, mescos cu impuesto riba productonan importa.

TURISMO

Turismo tambe ta hunga un papel importante den entrada di gobierno. Impuesto di hotel a genera casi diesun miyon florin den januari. E tipo di impuesto aki ta conecta directamente cu cantidad di turista y anochinan di hotel riba e isla. E cifranan ta mustra con fuerte finansas di gobierno di Aruba ta depende di actividad economico y consumo. Diferente di algun otro pais, gobierno di Aruba ta ricibi relativamente poco entrada for di fuente cu no ta impuesto. Pa un economia cu ta depende fuertemente riba turismo, esaki kier bisa cu cambio den cantidad di bishitantenan y den gasto di consumidor por tin un impacto directo riba entrada di gobierno.