AAA: No mester kita sapato mas na aeropuerto ora di screen pa biaha!

Posted on 03/12/2026 8:58 pm AST | Updated on 03/12/2026 8:59 pm AST

ORANJESTAD  - Aruba Airport Authority N.V. (AAA) diahuebs atardi  a anuncia un mehoracion importante den e proceso di screening di siguridad di pasahero na Aeropuerto Internacional Reina Beatrix (AUA Airport). Di manera inmediato, e pasaheronan cu ta sali di Aruba, no mester kita nan sapato mas durante screening di siguridad.  E mehoracion aki ta alinia cu e esfuersonan di AAA pa cumpli y garantisa e standardnan internacional di siguridad aereo y ta refleha e compromiso continuo di AAA pa mehora e comodidad di e pasaheronan, manteniendo e nivelnan di mas halto di siguridad. 

E procedura actualisa ta acelera e proceso di control, ta reduci e tempo cu e pasahero mester warda y ta mehora e experiencia general den aeropuerto, tur esaki sin compromete e protocolnan di siguridad. AAA ta colabora estrechamente cu su socionan di siguridad aereo pa garantisa cu siguridad ta sigui ta un prioridad. “Nos ta buscando continuamente maneranan pa mehora e trayecto di e pasahero”, asina Gershwin Lacle, Security Manager na AAA, a duna di conoce. El a continua bisando cu: “E actualisacion aki ta permiti nos pa provee un experiencia di screening mas eficiente y comodo mientras ta mantene e exigencianan estricto di siguridad internacional.”

Ta curasha tur pasahero pa sigui yega aeropuerto cu suficiente tempo prome cu ora di salida y pa sigui tur e guianan standard di siguridad pa loke ta trata likido, aparato electronico y documentacion di biahe. E mehoracion aki tambe ta refleha e compromiso strategico di AAA pa inverti den e ultimo tecnologianan di siguridad internacional di mas halto mientras ta mehora e eficiencia operacional y comodidad di pasahero. Door di modernisa su infrastructura di siguridad continuamente, Aeropuerto di Aruba ta mantene su compromiso di ofrece un experiencia di biahe sigur y sin complicacion pa tur pasahero.

 CON E ASUNTO DI KITA SAPATO A CUMINSA?

Tabata na Merca ora cu Transportation Security Administration (TSA) a introduci regla di kita zapato na aeropuerto na 2006, pero e regla a caba na 2025. E agencia   (TSA), oficialmente a establece na augustus di 2006 cu pasaheronan mester kita nan zapato durante control di seguridad na aeropuerto. E regla ey a wordo introduci como un medida permanente pa tur aeropuerto den Merca despues di e intento di atake cu e yamado “shoe bomber”. E intento ey tabata relaciona cu Richard Reid, kende a purba detona explosivonan escondi den su zapato durante un buelo for di Paris bai Miami riba 22 di december 2001.

DOS DECADA

Despues di casi dos decada, e obligacion di kita zapato finalmente a wordo elimina na juli di 2025, gracias na tecnologia di escaneo mas moderno. Aruba awor tambe ta aplica esaki. 

E INCIDENTE ORIGINAL

Riba 22 di december 2001, Richard Reid a purba detona explosivonan cu tabata  scondi den su sapato durante un buelo comercial for di Paris pa Miami. Pasaheronan y tripulacion a logra controla e situacion prome cu e explosivo por a detona.

DESAROYO DI E REGLA

Aunke algun control boluntario y ocasional a sosode despues di e incidente, e regla obligatorio pa tur pasahero di kita sapato no a wordo aplica oficialmente te na augustus di 2006.

EXCEPCIONNAN

Mas despues, TSA a introduci excepcion pa: muchanan di 12 aña of mas chikito, personanan di 75 aña of mas grandi , pasaheronan inscribi den programa TSA PreCheck

FIN DI E REGLA

Riba 7 y 8 di juli 2025, TSA a anuncia cu danki na tecnologia di  scanmas avansa, pasaheronan ya no ta mester kita nan sapato durante control normal di seguridad na aeropuerto. Pa casi 20 aña, e regla di kita sapato tabata un parti fiho di seguridad di aeropuerto den Merca, cu e meta principal di detecta material explosivo escondi. Con introduccion di tecnologia mas moderno, e medida aki finalmente a bira innecesario.

  • Powered by SETAR