Ronaldinho ta bin Corsou pa Legends Football Tournament 2026

WILLEMSTAD – Leyenda di futbol Ronaldinho ta bin na Corsou den luna di april pa participa den Legends Football Tournament 2026. E ex-campeon mundial brasilero y ganador di Ballon d’Or lo hunga pa e team di Brasil durante e torneo, cu lo tuma luga 9 y 10 april na Capital C. Binida di Ronaldinho a bira posible danki na un colaboracion entre Curacao Airport Holding (CAH) y Curacao Airport Partners (CAP). Segun e organizadornan, su participacion ta mustra cu e torneo ta gana atraccion internacional cada bez mas. E Legends Football Tournament ta wordo organiza desde 2023 pa Curacao Airport Holding hunto cu Curacao Tourist Board. Meta di e evento ta mustra cu Corsou por organiza evento deportivo internacional, y na mes momento contribui na atrae mas bishitante via aeropuerto. E aña aki e torneo ta celebra su cuarta edicion y lo expande di seis pa ocho pais participante. Pa prome bez Spaña y Italia lo participa. Nan ta uni cu Argentina, Colombia, Brasil, Portugal, Hulanda y anfitrion Corsou.

HOPI EX ESTREA RIBA PISTA

Hunto cu Ronaldinho, ainda mas ex-estreanan di futbol lo baha riba cancha. Pa Brasil, entre otro, lo hunga Rivaldo y Lucio, mientras Colombia lo ta representa pa Carlos Valderrama y Faustino Asprilla. Pa Argentina, Ariel Ortega y Rolando Schiavi lo participa. E team di Hulanda lo consisti entre otro di Wesley Sneijder y Clarence Seedorf, mientras Portugal lo manda hungadornan manera Ricardo Quaresma y Vitor Baia. Tambe Spaña y Italia lo bin cu nombernan conoci. Spanja lo ta representa pa Fernando Morientes y Michel Salgado, mientras Italia lo bin cu Marco Materazzi y Alessandro Nesta.

REPRESENTACION DI CORSOU

Na nomber di Corsou, varios ex-internacional lo participa, entre nan Stallone Isenia, Ranties ‘Terry’ Rosina y Ludjino ‘Jin’ Hojer. Durante e torneo, teamnan lo hunga partidonan cortico di dos bez 15 minuut. Segun organizacion, e formato rapido mester percura pa un programa spectaculo cu hopi accion. Segun organizadornan, e evento di dos dia no solamente mester atrae fanatico di futbol, pero tambe contribui na posiciona Corsou internacionalmente como destino pa deporte y turismo.