Mientras temporada di horcan 2026 ta acerca, cientificonan ta mira desaroyo di El Niño

Mientras temporada di horcan 2026 ta acerca, cientificonan ta mira desaroyo di El Niño

Posted on 03/11/2026 11:10 am AST | Updated on 03/11/2026 11:12 am AST

MIAMI - Manera un barco cu ta bin riba horizonte, temporada di horcan Atlantico pa 2026 ta acerca poco  poco. Awor cu ta poco mas cu tres luna pa cu e temporada cuminsa 1 di juni, meteorologonan ta ocupa preparando nan pronosticonan pa e temporada cu ta bin. Un di e factor mas importante cu cientificonan ta mira ta e ciclo di El Niño y La Niña den Oceano Pacifico tropical.

Segun investigador di horcan na Colorado State University, Phil Klotzbach, e pregunta mas grandi pa e temporada 2026 ta si El Niño lo forma y con fuerte e lo ta. Si El Niño realmente forma, ta probable cu temporada di horcan Atlantico lo ta un tiki menos activo cu normal.

Cientifico Andy Hazelton di University of Miami a indica cu, en general, e actividad di tormentanan por ta un poco menos e aña aki, pero ainda no ta cla con grandi e diferencia lo ta.

Segun National Oceanic and Atmospheric Administration (NOAA), durante temporada promedio di horcan entre 1991 y 2020 tabatin cerca di 14 tormenta cu nomber, di cual 7 a bira horcan. Di esnan, mas o menos 3 tabata horcan major (categoria 3 of mas halto).

INFLUENCIA DI EL NIÑO

El Niño – un calentamento natural di awa den Pacifico tropical – por tin un impacto grandi riba temporada di horcan Atlantico.

Normalmente, El Niño ta causa mas aire cu ta subi riba Pacifico tropical. Esaki por provoca biento mas fuerte den atmosfera halto riba Atlantico tropical, cu por dificulta formacion di horcan, specialmente den Caribe y Golfo di Mexico.

Sinembargo, cientificonan ta indica cu esaki no semper ta garantisa un temporada trankilo. Durante algun aña cu El Niño, temperatura di awa den Atlantico tabata asina halto cu e la compensa parte di e efecto di El Niño. Un ehemplo reciente ta 2023.

Ademas, horcan poderoso ainda por ocurri durante añanan di El Niño. E ultimo tres horcan di categoria 5 cu a yega Merca – Camille (1969), Andrew (1992) y Michael (2018) – a ocurri durante añanan cu oceano tabata moviendo pa condicionnan debil di El Niño.

POSIBILIDAD DI EL NIÑO

Segun e pronostico mas reciente di NOAA, tin cerca 60% probabilidad cu condicionnan neutral lo forma pronto, loke ta nifica cu e actual fase di La Niña lo termina dentro di poco tempo.

Cientificonan a nota cu calor den e parti halto di oceano den Pacifico tropical a aumenta bastante den e ultimo simannan, loke frequentemente ta indica cu e sistema ta moviendo pa condicionnan neutral of posiblemente El Niño.

Pa e parti central di temporada di horcan (augustus te cu october), NOAA ta calcula cerca 59% probabilidad di El Niño.

OTRO FACTOR IMPORTANTE

Aparte di El Niño, otro factor crucial ta temperatura di awa den Atlantico, specialmente den e region conoci como Main Development Region, entre Caribe y este di Antillas.

Si temperatura di awa den e region ey ta subi hopi, oceano Atlantico por compensa parte di e influencia di El Niño. Pero si e no subi hopi, El Niño por domina e temporada.

Investigadornan tambe ta wak Africa, pasobra un monsoon africano fuerte por aumenta formacion di tormentanan den Atlantico oriental.

TEMPORADA DI HORCAN AINDA NO TA CLA

Cientificonan ta enfatisa cu ainda ta hopi tempran pa haci un pronostico definitivo pa temporada di horcan.

Equipo di Colorado State University lo publica su prome pronostico oficial riba 9 di april, mientras cu NOAA lo publica su pronostico principal den final di mei. Temporada oficial di horcan Atlantico ta core di 1 di juni te cu 30 di november.

  • Powered by SETAR