Buki “Powerwomen in the Dutch Caribbean” a keda presenta na Corsou celebra Dia Internacional di Muher

WILLEMSTAD – Na ocasion di Dia Internacional di Muher riba 8 di maart, Avila Beach Hotel na Corsou a sirbi como escenario pa presentacion di e buki Powerwomen in the Dutch Caribbean. E publicacion, scirbi y compila door di Prof. dr. Frank Kunneman y dr. Linus Hesselink, ta presenta 17 portret di profesionalnan femenino remarcabel den e Reino Hulandes.

E buki ta basa riba un serie di entrevista cu muhernan cu a destaca den diferente sector profesional, describiendo nan trayecto di carrera, desafio y experencia personal. Segun e autornan, e meta di e proyecto ta pa mustra e contribucion importante di muhernan den sociedad y crea mas consciencia riba e rol cu nan ta desempeña den desaroyo social y profesional den region.

Durante e evento, Paula Kibbelaar a duna e keynote speech, basando su presentacion riba dato di su dissertacion academico, cu a wordo defende publicamente 21 aña pasa na Universidad di Utrecht. Segun Kibbelaar, pa un investigadora ta satisfactorio mira cu e analisis di dato cu e a presenta na e tempo ey ainda ta mantene su balor cientifico despues di tanto aña.

Mes momento, e la indica cu ta lamentabel cu hopi di e tema cu su investigacion a trata ainda ta actual y relevante den sociedad di awe. Esaki, segun  e, ta mustra cu apesar di progreso, ainda tin trabou pa haci pa logra igualdad y oportunidad equal pa muhernan den diferente campo profesional.

E presentacion di buki a forma parti di un seminario organiza door di Themis Institute, bou di liderazgo di Kunneman y su equipo. E encuentro a reuni participante di diferente pais den Reino Hulandes, crea un espacio pa reflexion, dialogo y inspiracion tocante e posicion di muhernan den Caribe Hulandes.

Cu e publicacion di Powerwomen in the Dutch Caribbean, e autornan ta spera di contribui na un conversacion mas amplio tocante liderazgo femenino y inspiracion pa generacionnan futuro di profesionalnan femenino den region.

“Happy International Women’s Day,” a declara e organizadornan, resaltando e importancia di continua celebra y reconoci e contribucion di muhernan den sociedad.