Minister di deporte di Iran ta exclui participacion den Copa Mundial di futbol na Merca

TEHERAN - Minister di deporte Ahmad Donjamali di Iran a exclui participacion di su pais den Copa Mundial di futbol cu lo wordo hunga, entre otro, na Merca, debi na guerra den Medio Oriente. “Despues cu e gobierno corrupto ey a mata nos lider, bou ningun circunstancia no tin condicion pa participa den e Copa Mundial,” Donjamali a bisa den un entrevista televisivo. “Mirando e accionnan malicioso contra Iran, den ocho of nuebe luna nos a ricibi dos guera imponi riba nos y miles di nos hende a perde nan bida.”

TRUMP TA HABRI PA PARTICIPACION DI IRAN

Mas prome awe, presidente di FIFA Gianni Infantino a anuncia cu Trump si ta habri pa participacion di Iran, cu a wordo coloca den grupo G huntu cu Belgica, Egipto y Nueva Zelanda. E torneo mundial lo wordo tene e zomer aki na Merca, Canada y Mexico. Tur partido di grupo di Iran ta programa na Merca, cuminsando 16 di juni contra Nueva Zelanda na Los Angeles. Ademas, tin un posibilidad cu Iran y Merca por enfrenta otro den e octavo di final. Pa esey, tur dos pais mester termina di dos lugar den nan grupo.