KLM ainda lo sigui bula cu Airbus riba Aruba pa awor

ORANJESTAD – KLM pa awor ainda no ta bay cambia su flota riba e ruta pa Aruba. Noticianan cu a circula den medio local na Aruba y Corsou no ta correcto segun gerente regional di KLM, Dirk Buitelaar. 

INFORME DI ATA

Recientemente Noticiacla a reproduci un informe di Aruba Tourism Authority cu a bisa textualmente cu   e actual flota Airbus lo wordo saca poco a poco for di uso y cu durante e feria di turismo ITB Berlin 2026 — e feria di turismo mas grandi di mundo — tabatin combersa entre KLM y Autoridad di Turismo di Aruba (ATA). Den e combersa ey tabata menciona cu un flota mas nobo lo trece mas stoel den Business Class y Premium Economy. Segun ATA, e cambio lo ta resultado di combersa cu KLM tocante expansion di capacidad riba e ruta entre Hulanda y Aruba. “Finalmente nos por confirma cu flota pa Aruba lo wordo adapta y cu Aruba lo ricibi mas stoel den categoria Business Class y Premium,” asina e organizacion a declara.

KLM NO A PAPIA CU ATA NA ITB

Sinembargo, KLM y ATA no a papia cu otro durante e feria, segun KLM. Loke si tin, ta un deseo di e gerente regional pa bula cu Boeing 777, mescos manera ta wordo usa pa Corsou. Teoricamente esei por ta posible ora Airbus 320 wordo saca for di uso na final di aña, pero pa awor Airbus 330 ta sigui bula normal pa Aruba. ATA ta mira un posible cambio manera algo importante pa atrae bishitantenan di segmento mas halto. Cu esey e organizacion ke sostene e crecemento di turismo for di Europa y fortalece posicion di Aruba como destinacion premium, pero pa esaki lo mester tin un tiki mas pasenshi.