Ta proba cu avionnan Twin Otter ta esnan mas efectivo pa bula rutanan cortico

WILLEMSTAD – Avionnan Twin Otter tin capacidad limita, pero pa distancia cortico manera e rutanan Corsou–Boneiru y Corsou–Aruba, nan ta e miho opcion. Pa avion, e cantidad di “cycle” di e motor ta conta y ta determina ki ora mester haci revision. Un “cycle” ta e proceso di start un avion, lanta buelo, aterisa y paga e motor atrobe. Pues, no ta importa cuanto minuut e avion a bula; cada bez cu e pasa den e proceso aki e ta conta como un “cycle”.

Mirando cu gastunan di mantencion y tambe gastunan di combustible, practicamente ta imposibel awendia pa bula cu otro tipo di avion riba e rutanan cortico aki. Asina ex-director di ALM, Cesar Prince, a duna di conoci den e podcast 3or cu Gino. Tin hopi discusion riba e conexion entre e islanan di ex Antianan Hulandes. Tanto e prijs di pasashi como e capacidad riba e buelonan ta parti di e discusion.

Prince ta mustra cu mester comprende cu companianan aereo priva ta wak pa nan opera nan compania mas efectivo posible pa asina por haci ganashi. No ta manera antes cu tabatin un compania aereo nacional, ALM, unda gobierno tabata supervisa su schema di ruta, tarifanan di pasashi y tambe exigi un cierto capacidad entre e islanan.

Tocante e gastu di pasashi, Prince ta bisa cu e no tin bista riba e structura di gasto di e companianan di aviacion.

Loke el si a indica ta cu gastunan di aeropuerto tambe a subi drasticamente compara cu antes. Aki el ta pensa cu Dutch Caribbean Cooperation of Airports (DCCA) kisas por hunga un rol pa baha e gastunan di aeropuerto pa buelonan entre e islanan. Otro aspecto cu por wordo mira ta e grado di ocupacion riba e rutanan, e ex-director a continua bisa. Prince a indica cu departamento di aviacion tabata controla e grado di ocupacion aki den pasado, y ora mira cu e grado tabata hopi halto, nan tabata indica cu ALM mester aumenta e cantidad di buelo riba e ruta. Esaki, sin embargo, no ta tuma lugar mas, pasobra awor companianan priva so ta bula entre e islanan y nan mes ta determina nan frecuencia di buelo.

For di 2023 e topico di un miho conexion entre e islanan a wordo pone riba agenda di e plataforma di consulta entre parlamentonan di e cuatro paisnan den Reino, IPKO, pa mira con por yega na un situacion miho pa pasaheronan cu ta biaha entre e islanan den Reino.