Secretario di estado nobo Van der Burg lo bishita Aruba na april

DEN HAAG – E secretario di estado Hulandes nobo pa Relacionnan di Reino, Eric van der Burg, lo haci un bishita na Aruba na luna di april. E la anuncia esey durante su prome encuentro digital cu prensa di Caribe (unda cu notiacla tambe tabata presente),despues cu e nobo gabinete na Den Haag a tuma cargo.

BISHITA ISLANAN ABC

Segun Van der Burg, pa 12 di april tin un bishita plania na Aruba, Corsou y Boneiru. Na luna di mei e kier bishita tambe Sint-Maarten, Saba y Sint-Eustatius. E proposito di e bishita ta pa, despues di e prome contactonan digital, conoce personalmente cu dirigentenan politico den e parti caribeño di Reino Hulandes.

PROME DIANAN DI TRABOU

Den su prome dies dia den funcion, Van der Burg a tene ya conbersacion cu gezaghebbernan di e islanan BES, y tambe cu gobernadornan y prome minister di e paisnan autonomo den Caribe di Reino. Tambe e la papia cu ministernan plenipotenciario di Corsou, Aruba y Sint-Maarten na Den Haag.

RMR

Durante e prome reunion di Conseho di Ministronan di Reino di e  gabinete Hulandes nobo, entre otro cosnan, a tuma decision pa manda un propuesta di ley tocante finansas publico sostenibel pa Aruba pa revision na Conseho di Estado. E propuesta pa e asina yama ley HOFA mester crea un forma similar di supervision financiero manera e sistema cu actualmente ta existi pa Corsou y Sint-Maarten via College financieel toezicht (Cft).

MESUN IMPORTANCIA

Van der Burg a enfatisa cu e islanan den Caribe di Reino ta mes importante pa e nobo gobierno Hulandes como Hulanda europeo. Segun e, prome minister Rob Jetten tambe a pone enfasis riba esey despues di e reunion di Conseho di Ministronan di Reino. E la recorda cu Reino Hulandes ta consisti di cuatro pais: Hulanda, Corsou, Aruba y Sint-Maarten, cu segun Statuto di Reino ta paisnan igual. Durante e conversacionnan cu e prome ministronan di e paisnan caribeño, a resulta cu nan ta spera un cooperacion mihora cu e nobo gobierno Hulandes. Nan tambe a expresa deseo pa papia personalmente cu ministronan Hulandes.

BISHITA DI TRABOU NA HULANDA

Ademas di e bishitanan plania pa april y mei, tin plan pa un bishita oficial di trabou di e prome ministronan caribeño na Hulanda, unda nan lo papia cu prome minister Jetten y Van der Burg. Segun e secretario di estado, e meta ta reforsa cooperacion entre e cuatro paisnan den Reino. Tema di seguridad tambe a wordo discuti durante e conversacionnan. Segun Van der Burg, Corsou y Aruba tin interes particular den cooperacion riba defensa y seguridad regional.