Parlamentonan di islanan CAS ta lanta comite riba conflicto den Reino hulandes

WILLEMSTAD/ ORANJESTAD  – Parlamentonan di Aruba, Corsou y Sint Maarten a establece un asina yama petit comite cu lo ocupa su mes cu e reglamento pa conflicto den Reino Hulandes. E prome reunion di e grupo di trabou ta programa pa 19 maart na Aruba. Establecemento di e comite a wordo confirma durante un consulta tripartito di e parlamentonan riba 23 februari na Aruba. E petit comite lo ricibi e tarea pa discuti y contesta preguntanan di Staten di Corsou acerca di e proposicion di ley di Reino pa trata conflicto den Reino. Den e comite lo tin parlamentario di e tres pais. Na nomber di Aruba ta participa Edgard Vrolijk y John Hart. Corsou ta wordo representa door di Quincy Girigori y Ramon Yung, mientras Sint Maarten ta wordo representa door di Egbert Doran y Sarah Wescot-Williams. E grupo di trabou lo presenta un raportahe na e consulta tripartito di parlamentonan. Tambe lo wordo warda un conseho di Raad van State prome cu algun proposicion concreto pa cambia e ley di Reino wordo presenta. E prome reunion di e petit comite lo tuma lugar 19 maart pa dies’or di mainta den sala di reunion di Staten di Aruba na Oranjestad.

UN DI E DOSIERNAN MAS DIFICIL

E discusion acerca di un reglamento pa conflicto den Reino ta core añanan caba y ta wordo considera uno di e dosiernan mas dificil den relacionnan constitucional den Reino. Desde e reforma constitucional di 2010, a wordo establece den Statuut cu mester tin un reglamento pa resolve conflicto huridico entre Reino y paisnan Caribense. E paisnan ya pa hopi tempo ta pidi pa tin un instancia independiente cu por haci desicionan obligatorio, mientras proposicionnan anterior for di Hulanda, segun Aruba, Corsou y Sint Maarten, no tabata suficientemente independiente. Un ley di Reino anterior a fracasa na 2021 den Eerste Kamer despues di oposicion di parlamentonan Caribense. E trayecto nobo mester finalmente conduci na un reglamento cu ta cumpli cu e exigencianan di Statuut.