ATSA: Cla pa contribui den un maneho y colaboracion constructivo p’un ‘Beach Policy’ sostenibel

Posted on 03/3/2026 8:59 am AST | Updated on 03/3/2026 9:00 am AST

ORANJESTAD - Den un encuentro recien cu minister di Turismo Wendrick Cicilia, e organisacion Aruba Timeshare Association (ATSA) a reafirma su compromiso completo den solucion constructivo, basa riba bon colaboracion cu gobierno di Aruba den cuadro cu desaroyo di un ‘Beach Policy’ sostenibel y balansa. ATSA a comparti cu minister cu recientemente nan a participa den e proceso investigativo di SER pa loke tas e proceso concerni cu Aruba su maneho di playanan, hunto cu su sosten di e consul pa haci un yamado na coordinacion mas structura, un maneho cu ta duidelijk, manera tambe cooperacion cu tur stakeholder envolvi. Como entidad representativo di un parti grandi di Aruba su sector di hospitalidad, ATSA ta para cla pa contribui den termino corto y largo pa solucionnan practico, sostenibel y cu ta sirbi interes nacional. ATSA ta enfatisa cu un colaboracion cu ta basa riba respet mutuo, transparencia, y responsabilidad comparti, ta esencial den por logra resultadonan duradero.

Aruba su playanan ta un di e isla su recursonan natural di mas precioso. Nan preservacion no ta solamente un forma di regulacion, e ta un responsabilidad colectivo. Habitantenan, bishitantenan, entidadnan gubernamental y sector priva ta comparti e responsabilidad pa mantene nos playanan limpi, safe y accesibel pa un y tur. Respet pa otro mester ta man den man cu respet pa nos medio ambiente.

ATSA ta haya cu pa progresa, bo mester traha den union c’un mesun meta positivo nacional. Turismo ta keda e entrada di mas grandi pa Aruba, pa mantene nos economia stabil como tambe nos bienestar social. Salvaguardiando nos medio ambiente y naturalesa mientras ta percura y segura cu tin claridad, ordo, y un maneho husto di nos playanan, ta fortalece nos comunidad y nos reputacion internacional. Adicionalmente na discusion di Beach Policy, ATSA ta sostene dialogo mas habri riba prioridadnan nacional cu ta contribui den calidad di bida y maneho di destinacion, incluyendo mehoracion di infrastructura manera nos careteranan, ‘waste-water management’, regulacion di zonido y tiramento di sushi, moratorio di construccion di hotel y condo, scarsedad di taxi, UTV exit-strategy y regulacion responsabel den corto termino den mercado di huur. E areanan aki, manera maneho di nos playanan, beneficionan di un maneho balansa, colaboracion di tur stakeholder envolvi y ehecucion consistente.

ATSA tin confiansa cu pa medio di dialogo structura y bon fe, den bon cooperacion cu otro, Aruba lo por yega na solucionnan cu ta refleha sostenibilidad den forma husto, y cu respet na tur. ATSA ta anticipa den mas dialogo cu minister di Turismo y tur otro partner relevante den e proceso formal venidero. Hunto, nos por sigura cu Aruba ta permanece un destinacion defini pa harmonia, cuido ambiental, respet mutuo, y prosperidad comparti.

TOCANTE ATSA

ATSA tabata estableci na 1994 y actualmente ta conta cu miembresia activo di mayoria di propiedadnan di vacation ownership na Aruba. E asociacion ta traha na nivel local hunto cu entidadnan gubernamental. Na nivel regional, unda Aruba ta sigui ricibi reconocemento manera un destino modelo pa vacation ownership, ATSA tin laso profesional y ta beneficia di colaboracion continuo cu ARDA, American Resort Development Association. Miembronan di Hunta Directivo di ATSA ta: Sulaika Kelly, President; Rina Geerman, Secretario; Pedro Vargas, Miembro di Hunta; Jurgen van Schaijk, Tesorero; y Luigi Heredia, Miembro di Hunta.

VIDEO: Maduro: Si nos sigui asinaki, e cantidad di turista cu ta bin Aruba lo hoga nos isla
ORANJESTAD – Si nos sigui asinaki, e cantidad di turista cu ta bin Aruba lo hoga nos isla. Asina e pionero di concepto di Timeshare na Aruba, Raymond Maduro a bisa recientemente den e programa Noticiacla LIVE. Maduro ta e persona cu a introduci Aruba cu e concepto hotelero di Timeshare den añanan 70, cu hotelnan manera Aruba Beach Club, Playa Linda, Casa del Mar y Costa Linda. Segun Maduro, un persona di Nacionan Uni a bisa cu Aruba a surpasa e cantidad ey caba.
Mas Economia
Lesa Mas
ATA a honra Ewald Biemans pa su dedicacion na bolsa turistico ITB di Berlin
BERLIN - Aruba Tourism Authority (A.T.A.) cu gran honor a reconoce Ewald Biemans pa su dedicacion remarcabel y tur e añanan cu el a inverti promoviendo Aruba na Europa. E momento special aki a pasa durante e presencia di Aruba na ITB Berlin, hunto cu hopi partner di e industria, y den conmemoracion di 40 aña di Status Aparte, 50 aña di nos Himno y Bandera y e di 60 aniversario di ITB.
Mas Economia
Lesa Mas
Hoogervorst: Aunke e debe ta bahando, Aruba mester di HOFA
ORANJESTAD – Aruba mester di HOFA, aunke cu cos ta bayendo bon. Asina e presidente di e colegio di supervision financiero pa Aruba CAFt, drs Hans Hoogervorst a bisa Tito Laclé den e programa Noticiacla LIVE diahuebs anochi. E pregunta specifico riba e ponencia di parlamentario di MEP Evelyn Wever Croes, cu durante reunion di IPKO recientemente a bisa cu Aruba no mester di e ley di reino HOFA, mirando cu Aruba ta bayendo bon caba sin dje. Hoogervorst a admiti cu Aruba ta bayendo bon, pero, cu ainda Aruba tin un debe!. Y pa seguridad pa futuro, esey ta suficiente motibo pa tin HOFA toch.
Mas Economia
Lesa Mas
Consalves: Aruba lo por dicidi entre mei y juni riba re-apertura di buelonan cu Venezuela
ORANJESTAD – Segun e hende di mision di Hulanda Carmen Consalves den un entrevista cu e periodista venezolano Román Lozinski, e Prome Minister di Aruba Mike Eman ta preve di tuma un desicion entre mei y juni riba e posible reapertura di buelonan entre Aruba y Venezuela. Segun e informacion comparti, gobierno di Aruba ta sigui evaluando e situacion politico y di seguridad na Venezuela, hunto cu consulta cu autoridatnan den Reino Hulandes. E decision final lo depende di varios factor, incluyendo desaroyo den e situacion regional y e condicionnan pa garantisa control y seguridad den trafico aereo.
Mas Economia
Lesa Mas
FCCA ta inverti 46 miyon florin den casnan social na Aruba
ORANJESTAD – Woningstichting FCCA lo inverti un total di 46 miyon florin den construccion di entre 304 y 370 casnan social na Aruba. Mitad di e fondo ta bin for di gobierno, mientras e otro mitad ta bin for di e fundacion mes. Segun e involucradonan, e situacion riba mercado di vivienda na Aruba ta preocupante. Demanda pa cas y pa tereno di construccion ta hopi halto.
Mas Economia
Lesa Mas
Aruba ta fortalece conexion aereo na Routes Americas 2026 na Rio de Janeiro
ORANJESTAD — E team di Aviation Business Development di Aruba Airport Authority N.V. (AAA) conhuntamente cu Aruba Tourism Authority (A.T.A.), ta representando Aruba e siman aki na Routes Americas 2026 na Rio de Janeiro, e evento lider den desaroyo di servicio aereo di e region. Cu mas di 20 reunion programa cu e aerolineanan y partnernan clave den e industria, e delegacion ta enfoca riba desaroyo di red y identifica oportunidadnan strategico di crecemento pa sigui fortalece e conectividad global di Aruba. Entre e aerolineanan nobo confirma pa reunion, cu actualmente no ta opera pa Aruba tin; Air France–KLM, Breeze Airways, Alaska Airlines, JetSMART y Condor, ademas di otro partnernan existente cu ta di gran balor pa Aruba.
Mas Economia
Lesa Mas