Prijs di petroleo y kerosin ta subiendo debi na guera na Medio Oriente

QATAR - E tension den Medio Oriente tin un impacto grandi riba mercado financiero. E accionnan di companianan di aviacion manera AF-KLM ta cayendo, mientras e prijs di petroleo — y asina tambe e prijs di kerosin — ta subi fuerte. Tanker di petroleo no por pasa y un di e refinaderianan mas grandi di mundo a wordo cera temporalmente.\ Paso companianan di aviacion no por bula pa gran parti di Medio Oriente, inversionistanan a perde confianza den e sector. E accion di Air France-KLM a baha mas cu 7 porciento. IAG, e grupo tras di British Airways y Iberia, y easyJet a baha 7 y 4 porciento na Londres. Na Frankfurt, Lufthansa a perde 6 porciento.

DEN TUR REGION

Tambe companianan asiatico y Qantas a baha fuerte den balor. Qantas a baha mas cu 10 porciento na apertura y a cera riba minus 5 porciento. Japonese ANA Holdings, Air China, China Southern Airlines, China Eastern Airlines, e malasio AirAsia X y e taiwanes China Airlines y EVA Airways tur a baha por lo menos 4 porciento. Segun experto nan, e causa principal ta e costo di combustible mas halto, cancelacion di buelonan y costo adicional paso mester bula rond di region. Delta y American a baha desde bierna mas o menos 6 porciento, mientras bolsa di New York ainda tabata cera. Bolsanan den Emiratonan lo keda cera dialuna y diamars.

KEROSIN

Prijs di petroleo a subi fuerte pa motibo di e tension den region ricu di petroleo di Medio Oriente. Un bari di petroleo di Merca a subi 9 porciento te na 73,05 dolar, y petroleo Brent a bira casi 10 porciento mas caro te na 80 dolar. Prijs di kerosin ta depende fuertemente di petroleo. Petrobras a aumenta su prijs cu mas cu 9 porciento, segun Reuters a reporta bierna. Mercado ya tabata anticipando e eskalacion di violencia den fin di siman.

TANKER PARA

Mas cu 200 barco, incluyendo tanker di petroleo y gas liquido, segun dato di nabegacion a laga ancla diasabra pafor di e estrecho. Tres tanker a wordo daña y un marino a perde bida durante atakenan diasabra den awa di Golfo.

ATAKE CU DRONE

Compania estatal saudita Saudi Aramco a para e grandi refinaderia Ras Tanura dialuna mainta despues di un atake cu drone cu a causa un chikito candela den e complejo. Segun autoridadnan, ta un medida preventivo: no tin daño grandi ni herido. Ministerio di Defensa di Arabia Saudita a bisa cu dos drone a wordo intercepta cerca di refinaderia y cu e candela a surgi pa resto di e drone nan. Ras Tanura ta situa na Golfo Persico y ta un di e refinaderianan mas grandi di mundo, cu un capacidad di produccion di 550.000 bari di petroleo pa dia.

Atencion di inversionistanan awor ta riba cuanto largo e conflicto den Medio Oriente lo dura. Si e conflicto prolonga, experto nan ta preve un subida adicional fuerte di prijs di combustible. Iran, cu dialuna pa di tres dia consecutivo a ehecuta atakenan riba region di Golfo y Israel como represalia pa ofensiva americano-israeli, a indica cu no kier negocia cu Merca.