Aruba ta e di dos pais na mundo pa loke ta dependencia di industria di turismo

ORANJESTAD – Aruba ta pertene na e paisnan cu na nivel mundial ta depende mas fuerte di turismo pa nan economia. Esaki ta resulta for di un comparacion internacional nobo di Visual Capitalist tocante e participacion di turismo den e producto interno bruto di paisnan. Den e ranking ey, Aruba ta ocupa e di dos luga na mundo.

Segun e comparacion, turismo ta representa casi setenta porciento di e economia arubiano. Solamente Macau ta mas dependiente ainda di turismo. Asina, e analisis ta confirma cu crecemento economico, empleo y entrada di gobierno na Aruba ta den gran medida conecta cu e cantidad di bishitante.

E cifranan ta mustra cu Aruba, den perspectiva internacional, ta excepcionalmente dependiente di e sector turistico. Den mayoria di paisnan, e participacion di turismo den economia ta keda bou di dies porciento.

CORSOU

Corsou no ta aparece den e top di economianan mas dependiente di turismo. Esaki ta indica un base economico mas amplio. Aunque turismo tambe aya ta un fuente importante di entrada y empleo, e economia ta sostene riba varios sector.

Ademas di turismo, na Corsou e haf y logistica, servicio financiero internacional, almacenamento y transbordo di petroleo ta hunga un rol importante. E mezcla ey ta haci cu e economia ta menos unilateramente dependiente di cantidad di bishitante cu na Aruba. fuente: Aruba.nu.