Encuesta: Gabinete AVP-FUTURO su prome aña ta mustra poco confianza y hopi desilusion

Encuesta: Gabinete AVP-FUTURO su prome aña ta mustra poco confianza y hopi desilusion

Posted on 02/27/2026 10:24 am AST | Updated on 02/27/2026 11:04 am AST

ORANJESTAD - Un encuesta reciente entre lectornan di NoticiaCla cu tin acceso na internet ta pinta un cuadro no mucho positivo pa gabinete AVP-FUTURO, despues di su prome aña di gobernacion. Mas cu un simple evaluacion politico, e resultadonan ta mustra un problema di percepcion, liderazgo y credibilidad cu merece atencion serio — tanto di gobierno mes como di oposicion.

ATENCION PUBLICO TA HALTO, PERO APROBACION TA ABOU

Promer punto cu ta sali na cla: 84% di e encuestadonan a sigui e trabou di gabinete durante e prome aña. Esaki ta indica cu interes publico den gobernacion ta halto. Solamente 2% a bisa cu nan no a sigui e gobierno y 15% “un poco so”. Es decir: e evaluacion negativo cu ta sigui no por wordo atribui na falta di informacion. Contrario, e opinionnan ta forma riba un publico relativamente bon informa y activo.

EVALUACION GENERAL: MAYORIA NEGATIVO

Ora di puntra con nan a haya e actuacion general di e gabinete, e cuadro ta contundente: Combinando e categorianan, 53% ta evalua e gabinete como malo of hopi malo, contra solamente 18% positivo. E resto ta neutral. Politicamente, esaki ta un señal cla: despues di un aña, e gobierno no a logra crea un narrativa di progreso cu a convence un mayoria di e publico cu ta sigui su trabou.

LIDERAZGO: AUSENCIA DI FIGURA FUERTE

Un di e resultadonan mas significativo, ta e pregunta riba cua minister a resalta mas. E respuesta dominante tabata: “niun di nan” cu 44%. Entre e nombernan individual, esnan cu a resalta mas, tabata Geoffrey Wever: 23%, Arthur Dowers: 9%, Gerlien Croes: 7% cu a logra mas cu e prome minister mes, Mike Eman: cu a haya 6%. Esun cu a ricibi menos cu tur, ta Rene Herde: 1%. Esaki ta mustra dos tendencia interesante. Promer: E ta un percepcion di un gabinete como colectivo sin figura dominante. Di dos: Asta e prome minister mes no ta sobresali den percepcion publico. Pa un gobierno nobo, despues di un aña, falta di un lider cla  cu publico ta asocia cu direccion y resultado, ta un debilidad politico serio.

LOGRONAN: PERCEPCION DI BACIO

Ora cu a haci e pregunta riba cua tereno, e gabinete a logra mas, e resultado ta aun mas duro: Aki 56% a bisa: Niun. Economia a haña 14%, mientras medio ambiente casi nada. Esaki no necesariamente ta nifica cu no ta tin politica of trabou haci. Pero politicamente, e percepcion dominante ta cu gobierno no a logra comunica ni materialisa logro tangibel cu publico ta reconoce.

INTEGRIDAD: CONFIANZA LIMITA

Riba integridad di gabinete, tambe cos no a bay bon: Aki 33% a bisa cu e tabata  hopi malo, 23% malo, 11% bon, 6% hopi bon. Atrobe un mayoria tabata negativo (56%). Pa cualkier gobierno, percepcion di integridad ta fundamental. Si mas cu mitar di un publico informa, ta evalua integridad negativamente despues di un aña, esaki ta indica un deficit di confianza cu por tin impacto riba tur decision politico.

LECTURA GENERAL: PROBLEMA DI PERCEPCION Y DIRECCION

Combinando tur resultado, e encuesta ta apunta na tres conclusion principal: Gobierno no a logra establece un narrativa di logro. E mayor percepcion ta “niun logro”, y liderazgo no ta percibi como fuerte of visibel. Pa loke ta minister cu tabata mihor, e mayor respuesta tabata “niun minister”. E confianza den integridad ta limita, y e mayor evaluacion ta negativo.

DISCLAIMER 

Ta importante pa nota cu e encuesta ta entre lectornan di noticiacla, cu tin acceso na internet — un segmento probablemente mas informa y mas critico cu promedio di poblacion. No ta un sondeo nacional representativo. Pero, pa un medio di opinion publico, esaki ta precisamente e grupo cu ta forma discurso politico y mediatico. Percepcion den e grupo aki tin peso desproporcional den clima politico.

CONCLUSION

Despues di su prome aña, gabinete AVP-FUTURO segun e encuesta aki, ta enfrenta un desafio central: no solamente logra resultado, sino haci nan visibel y creibel. E encuesta ta mustra cu pa hopi lector activo di noticiacla, gobierno ainda no a logra convence cu tin direccion cla, liderazgo fuerte y logro concreto. Politicamente, esaki ta un advertencia tempran. Pasobra den gobernacion, percepcion negativo prolonga hopi biaha, ta termina bira realidad politico.

  • Powered by SETAR