Na Hulanda, hackernan di Odido a publica parti di dato di clientenan atrobe

AMSTERDAM - E grupo criminal di hacker ShinyHunters a publica awe mainta tempran atrobe un parti di e miyones di dato di clientenan hackea di proveedor di telecomunicacion Odido riba e darkweb. Ta trata di mas o menos 1 miyon regla di dato. Aun no ta cla cuanto clientenan esaki ta toca. Na e prome publicacion di dato personal sensibel ayera, tabata tambe mas o menos 1 miyon regla di informacion di cientos di mil clientenan. Den total, segun Odido, dato personal di mas cu 6 miyones cliente a wordo roba. E criminalnan digital a bisa cu nan lo publica cada dia 1 miyon regla di dato, cu e meta di aumenta presion riba e compañia di telecomunicacion al maximo.

DEADLINE A PASA

ShinyHunters a cuminsa publica e dato despues cu un deadline pa paga rescate a pasa ayera. E grupo hacker a pidi mas cu 1 miyon euro di Odido, pero e compañia no a paga. Polis semper ta conseha empresanan hackea pa no paga rescate, pasobra asina e modelo di negocio di e criminalnan ta keda existi.

CHECK DI FILTRACION DIFICIL

Check mesora si bo dato a wordo filtra ta casi imposibel. Ta trata di archivonan di dato di 10 gigabyte riba e darkweb. Sinembargo, personanan por haci un verificacion riba e website Have I Been Pwned. E sitio ta check si un adres di email a wordo involucra den filtracionnan di dato, y awor tambe ta haci esaki pa e filtracion di Odido. E website ta mira solamente na dato cu e hackernan a haci publico. Tin un cierto retraso entre publicacion di e hackernan y procesamiento di e informacion.