ONU: Proteccion di derechonan di muhe riba islanan Caribense ta keda atras

ORANJESTAD — Proteccion di derechonan di muhe den parti Caribense di Reino Hulandes ta insuficiente. Asina   un comite di Nashonnan Uni pa eliminacion di discriminacion contra muhé den un evaluacion nobo di Hulanda y paisnan Caribense den Reino ta indica.

RIESGO DI PROSTITUCION

Segun e comite, riba Aruba, Corsou y Sint Maarten tin riesgo di prostitucion forsa y explotacion sexual di muhe y mucha muhe. Tambe ta señala presencia di trabou sexual cu menor di edad y falta di programanan accesibel pa muhenan cu kier sali for di prostitucion. E comite ta yama pa miho prevencion, mas apoyo pa victima y procedura di denuncia mas accesibel y confidencial serca polis y instancianan di yudansa Ademas, e comite di ONU ta critica   legislacion di aborto riba e islanan duramente. Aborto ta castigabel na Aruba, Corsou y Sint Maarten y muhenan, specialmente migrantenan, segun e comite, tin dificultad pa haña acceso na cuido di aborto seguro y pagabel.

DESCRIMINALISACION DI ABORTO

E comite ta yama pa descriminalisacion di aborto y ta pidi cu, por lo menos, aborto bira legal den caso di violacion, incesto, peligro pa bida of salud di muhé y den caso di anomalianan serio na fetus. Segun e organo di ONU, tambe mester sigura acceso seguro, legal y pagabel na cuido di aborto den henter Reino. E descubrimientonan ta parti di un evaluacion periodico di ONU riba con Hulanda y paisnan den Reino ta proteha derechonan di muhe. E comite ta pidi gobierno pa tuma medidanan pa mehora legislacion, proteccion y acceso na cuido riba e islanan Caribense.