Crecemento record:Banconan arubano ta procesa 16 biyon florin digitalmente

ORANJESTAD – Trafico di pago digital na Aruba a sigui crece fuerte den 2025 y a yega un nivel record. Esaki ta sali for di e infographic nobo Annual Interbank Transfers 2025 di Banco Central di Aruba (CBA). Den total, den 2025 a wordo ehecuta mas cu cuatro miyon transferencia interbancario. Esaki ta representa un subida di mas cu catorce porciento compara cu 2024. Tambe balor total di e transaccionnan a aumenta: banco nan hunto a procesa mas cu diesiseis miyon florin, un crecemento di mas cu doce porciento riba base anual.

AUMENTO STRUCTURAL

E cifranan ta mustra un aumento structural cla den trafico di pago digital. Desde 2020, tanto e cantidad como e balor di transaccionnan interbancario a subi tur aña. Segun banco central, esaki ta refleha un uso cada bez mas grandi di medio di pago electronico y un digitalisacion mas avansa di servicio financiero riba e isla. Promedio, cada habitante a ehecuta 38 transferencia interbancario den 2025, tambe un aumento compara cu añanan anterior. Cu esey e tendencia ta sigui: consumidor y empresa nan ta escoge cada bez mas pa transferencia digital en lugar di pago cash.

E infographic di Banco Central ta mustra cu trafico di pago na Aruba ta den un fase di crecemento sostenido y modernisacion, cu un rol cada bez mas grandi pa transaccionnan bancario electronico y online.