Cuba: cuatro tripulante di speedboat Mericano a wordo mata, ‘nan kier tabata crea terror’

MIAMI - Autoridadnan Cubano ta bisa cu guardacostanan a mata cuatro tripulante di un lancha Mericano. Seis otro tripulante lo tabata herida. Segun Cuba, e speedboat a drenta awa territorial Cubano for di Merca. Autoridadnan ta bisa cu tripulantenan di e embarcacion Mericano a habri candela prome, despues guardacostanan a tira bek. E capitan Cubano di e barco di guardacosta tambe lo tabata herida. Segun medio estatal Cubano, e dies personanan na bordo tabata Cubano cu ta biba na Merca y cu “tabata purba infiltra e isla pa crea terror”. Gobierno Cubano ta afirma cu nan tabatin fusilnan, pistolan y molotovcocktail hunto cu chaleco antibala. E seis heridonan riba e lancha for di Florida, segun Cuba, a wordo hiba hospital. Ademas un persona na Cuba a wordo detene den relacion cu e incidente, medio estatal ta reporta.