Odido no ta paga suma di rescate, criminalnan ta publica parti di datonan roba di cliente

AMSTERDAM - Compania di telecomunicacion hulandes Odido no lo paga placa di rescate na e hacker-nan cu e luna aki a horta miyones di dato di cliente cerca e compania. E grupo di hacker ShinyHunters p’esey a publica un parti di e informacionnan sensitivo di privacidad di clientenan riba e darkweb, un parti di internet dificil pa yega na dje.

Cuanto dato exacto a wordo publica ainda no ta conoci. Prome e criminalnan a amenaza pa publica 1 miyon regla di dato (adresnan di email, numbernan di telefono) pa dia mientras Odido no paga.

E criminalnan tabata a pone Odido un deadline cu ta vence awe tardi ora di Hulanda. Nan ta exigi un suma desconocido pa preveni publicacion di e dato roba.

Odido pues no ta bay aden cu esey. “Nos foco ta serca clientenan,” un vocero di e compania a bisa NOS. “Riba conseho di asesornan y instancia di gobierno nos a dicidi di no negocia cu e grupo aki. Awor nos ta enfoca riba seguridad di clientenan.” Con e compania lo haci esaki ultimo ainda no ta conoci.