Minister Dowers kier un reorganisacion structural di Ministerio di Husticia

ORANJESTAD – Minister di husticia Arthur Dowers kier un reorganisacion structural di Ministerio di Husticia. Diamars mainta, Minister Dowers a ricibi un presentacion duna pa DRH, den cual a presenta e structura nobo (Blueprint) pa Ministerio di Husticia. E presentacion aki a brinda un bista amplio di con e diferente instancianan cu ta resorta bao di Ministerio di Husticia ta ubica y con nan ta relaciona cu otro den e structura nobo.

BLUEPRINT NOBO

E concepto di Blueprint nobo ta inclui instancianan manera Bezwaarcommissie LAR, Directie Wetgeving en Juridische Zaken, Directie Justitie, Veiligheid en Migratie, Ministerio Publico/Procureur-Generaal y Sui Generis Kansspelautoriteit. 

DEFINI DEPARTAMENTONAN

Den e structura nobo aki ta defini con diferente departamento/entidad operativo ta structura. Entre nan ta DIMAS, Korps Politie Aruba (KPA), Bureau Integriteit Aruba (BIA), Landsrecherche y varios otro departamento den Husticia. Cada un di e entidadnan aki tin nan posicion defini den e structura general, cu un linea di responsabilidad, tarea y supervision cla.

FORTALECE GOBERNACION

Pa Minister Dowers, e presentacion aki ta un paso importante den fortalecemento di gobernacion y claridad institucional. Un structura cla y moderno ta esencial pa garantisa eficiencia, transparencia y responsabilidad den e maneho di Husticia.

Un reorganisacion structural mester contribui na mas colaboracion entre instancianan, decisionnan mas rapido y un servicio mas efectivo pa comunidad. E proceso aki ta parti di un vision mas amplio pa modernisa y fortifica e “domein” di Husticia.