Na Corsou tambe tin scarsedad di plachi di number di auto

WILLEMSTAD.- Tin retraso di entrega di plachinan di number di outo nobo. Esaki ta trese kuné ku tur probabilidat, repartishon di e plachinan i number nobo lo tuma lugá awor den luna di mart próksimo. Den luna di yanüari último minister di finansa sr. Charles Cooper a anunsiá  ku den e di tres siman di luna di febrüari lo kuminsá ku repartishon di e plachinan di number nobo.

Sinembargo ayera minister Cooper a indiká ku tin un tiki tardansa pa ku yegada di e plachinan di number di outo nobo. Esaki e por a komprondé di e hefe di Ontvanger suplente.

T’asina ku tin dos kònteiner na kaminda. E promé kònteiner ta yega dia 23 di febrüari, esta otro siman, i e di dos kònteiner ta yega dia 5 di mart próksimo. Pues entrega di e plachinan di number sigur lo bai ta den luna di mart. Manera ariba indiká den komienso di yanüari último, minister Cooper a anunsiá introdukshon di e plachi di number di outo nobo, despues di ku 10 aña ku tin esun aktual. E gastu mará na e plachi di numbernan ta di 2.4 mion florin.

Na momento ku minister Cooper a anunsiá e plachinan di number di outo nobo, a anunsiá tambe ku siudadanonan por a kuminsá paga nan belasting di outo, en espera e siman akí pa por a tuma nan plachi di number. Entrega di e plachinan di number ta planiá pa tuma lugá na Las Vegas Shopping Center, den e espasio unda ántes Las Vegas Supermarket tabata situá. Pero manera ariba indiká tin retraso den yegada di e plachinan di number na Kòrsou. Segun minister Cooper tin alrededor di 90 pa 100 mil outo na Kòrsou. NOTA: Texto ta scirbi den papiamento fonetico di Corsou.