Na Corsou, dokternan lo por gana mas cu LNT norm, pa tene nan riba e isla

WILLEMSTAD – Specialistan medico riba Corsou por ricibi, den ciertonan caso, un salario mas halto cu e maximo cu ta stipula den Landsverordening Normering Topinkomens (LNT). Esaki ta sali for di un splicacion riba e ley, unda ta bisa cu e minister di Salud por dicidi pa caso pa permiti un excepcion. Segun e regla, un specialista por wordo paga ariba e maximo stipula solamente despues di un evaluacion y calculacion pa ministerio di Salud, Medio Ambiente y Naturalesa, den consulta cu ministerio di Finanzas y cu aprobacion di Conseho di Minister. Den e desicion ey ta wordo fiha cu cual porcentaje of suma e maximo por wordo supera.

E LNT ta fiha un entrada anual maximo pa funcionarianan halto den gobierno y empresanan gubernamental. Pa entidadnan grandi, e maximo ey ta 386.000 florin pa aña. Pa specialistanan, awor ta haci un excepcion posible, principal pa motibo di escasez di ciertonan specialismo medico y e necesidad pa baha listanan di espera den cuido di salud, specialmente na Curaçao Medical Center (CMC). For di raporthenan reciente di Inspectie pa Salud Publico ta sali, segun e splicacion, cu e problemanan di personal na CMC no ta solamente liga cu introduccion di LNT. Di empleadonan cu a bay na 2023, solamente un parti chikito a laga pa motibo di norma di salario. Mayoria a bai cu pension, a cambia funcion internamente of a laga pa otro motibonan personal. Un parti di e salida ya a wordo compensa cu nombramentonan nobo.

Gobierno ta enfatisa cu e puntanan critico den sector di salud ta di caracter structural y ya ta existi hopi mas tempo. Subi e norma di salario pa specialistanan medico ta wordo mira como un instrumento limita pa tene hospital atractivo como empleado  y pa mehora accesibilidad di cuido di salud.